Selektie van artikelen uit:

DE MELKTUIT 2007

_______________________________________________________

Veurzitter Graat

Aan't waord

Van de ňpperklómp Graat.

Eers nog ein waord van dank aan ózze (aaje) Burgemeister Krit van de Kuuper, dae zien ambt nae elf jaor haet neer gelach, en dit mit vólle euvertuuging haet euverge-draege aan Drikus. Deeze haet ’t aafgelaupe jaor zien eerste broedspaar Marie en Jonas in de ónech verbónje, en dit ging lekker ontsjpanne en ’t waas weer eine gezellige boel.

Marie en Jonas höbbe ’t spjel begrepe en gesjpeelt en same mit alle mitwerkers van ’t Klumpke höbbe veer der weer eine dolle boel van gemaakt. Names ’t bestjuur wil ich heur hiejbiej nochmaals van herte bedanke.

Op ózze boeredaag in juni höbbe veer ós 15 jäorig bestjaon van ’t Klumpke in be-sjlaote kring geviert. Óm noch ekstra sjaket hiej aan te gaeve, haaje d’r noch driej van ózze leeje ein jubilejum, Fritske, Frenske en Krit wearde alle driej 60 jaor en ziej höbbe deeze zónnige daag good in elkaar gezat. In september pakke veer de draod weer op veur ein nuuj sezoen, broedspaar zeuke, advertenties ophaole, melktuit make, en programma in elkaar zitte, jao, veur vaöl van ós begint de lol en plezeer al lang veur de elfde van de elfde.

Ich besjloet mit dit veurwaord, mit dank te zegke aan alle laezers, sjpónsórs en adverteerders en leeje , veur ’t toet stjandj kómme van dees Melktuit en auch ein waord van dank aan Wullem dae dees melktuit in elkaar zit. Kiek veural allemaol op ózze web-site; www.tklumpke.homestead.com, veur ’t letste nuutjs te bekieke en te laeze, en det ’t hele jaor daor.

 

Mit de Boeregroetjes van,

Graat van Sjtien en Niek van de Bekker, wienboer eerste Klas, Veurzitter.

___________________________________________________________________

 

Leef luuj van Hoogvónjere

Truuke, de sjriefster van ut Klumpke, haet mich geknepe, aan mien oor gehange , mien vrouw emeeltjes gesjtuurd ,gedreig det ut neet meer veur mich wil type en det alles allein mer omdet eine burgemeister ut ouch waal ins drök kin höbbe mit biejbaantjes! Truuke zuut gaer, det ich ein sjökske sjrief euver ut aafgeloupe sezoen, mer waat mot ich dao noe euver sjrieve es ze sjprakeloos bös? Zegk noe zelf … ut broedspaar waas in ein waord geweldig, die tweej höbbe zich op ein geweldige meneer gepresenteerd tiedes ut vastelaoves sezoen en daomit ut Klumpke op ein heel gooj meneer in de picture gezatte! Van heur getuuge Greta en Bloome Antje höbbe ziej veul sjteun gehad. Mit zien veere höbbe ziej ein sjoon sjpeel gesjeeld. De broelofsgaste waore echte feesgengers en zelfs de veldjwachters zeen dit jaor in toom gehaaje en nog waal door os nuujste aanwins in de vereniging ozze jonge veldjwachter in opleiding Sjefke.

Of det alles nog neet genog is, dit jaor haet ut duo C en A ( Krit en Bloome Antje) ouch nog de 1ste pries gewonne tiedes de cd presentatie mit heur zelf gesjreve en gecomponeerde leedje “Sjoone vastelaovend”

Kortom ut waor ein groot fees in 2006!!! Waat een prachtig begin veur mich es burgemeister van ut Klumpke. Natuurlik wil ich ein waord van dank oetsjpraeke veur ederein dae mich dit eerste jaor geholpe haet om mien rol van burgemeister good oet te veure.

Ut broedspaar van 2007, “ Truu en Keub mit haor getuuge Marie Antoinette en Rich” wins ich ein prachtig sezoen toe! Veer gaon der same mit ederein weer ein knallend fees van make.

Mit edelachbare groeten, 

Drikes eure burgemeister

    _____________________________________________________

 

Óngertrouw

 

Names de burgemeister van Hoogvónjere de Weledelachbare ouch waal Dorstlustige hoogheid geneumd

De heer

Drikes, zoon van Arendina en Knilles de sjtraotvaeger oet Baore.

Is aan mich de plich om idderein d’r van in kinneste sjtelle, det óngersjtaonde boereluuj te kinne höbbe gegaeve, det ziej in de (0n)ech wille trouwe en waal op:

Zóndaag 11 fibberwarie a.s.

Broedegom: Keub, zoon van Johannes Hubert, de sjtäöker oet Zjwame en van Fien oet Ool.

Broed: Truu, dochter van Teike, de kaoleboer oet de Boesj en Ennie oet Broensem.

Idderein, dae waal of gein gegrondje bezwaore haet taege dit veurgenaome huwelik waert verzóch om det veural tiedes de huweliks ceremonie in ‘t aopenbaar kinbaar te make!

Names de burgemeister van Hoogvónjere
en
De sjriever van de burgelikke sjtandj:

‘t Höt van Marie van Mienekes oet Postert en de Geit van Sjörgers oet Sittard.

 

_________________________________________________

 

Boere Broedspaar 2007

Keub, zoon van Johannes Hubert, de sjtäöker oet Zjwame en van Fien oet Ool

En

Truu, dochter van Teike, de kaoleboer oet de Boesj en Ennie oet Broensem

 

Heur getuuge:

Rich Johan Helena

En

Marie Antoinetta Gertruda Vulcano van Atteveld

______________________________________________

 

KINNISMAKING Bruudje:

Aeve veursjtelle:

Ich bön Petri de Rechter en miene maedjesnaam is Remmen. Dit jaor bön ich de boerebroed biej ut Klumpke en gaon noe es Truu door ut laeve. Ich bön al 34 jaor getrouwd mit aad vors Thei ,wie haaj ich ut vol, he. Mer aaf en toe is ut eine hele leeve sjat! Mien hobbies zeen sjporte, lekker aete, wanjele mit Bo de sjwarte kielf of fietse, vastelaovend viere en lekker op ein terrasje zitte laeze en nao miense kieke. Ich bön de dochter van kaoleboer Thei , alweer eine Thei, oet Abdissenbosch, det neume veer dao d’r Busch en van kleiernejster Annie Frings oet de Greunsjtraot. Thei en ich höbbe same twee gezónje kienjer Marco en Melissa. Marco is 30 jaor en al jaore draodjesprutser, geer waet waal emes dae ut leech brink en det kint der heel good vinj ich. Melissa is 24 jaor en det geit nog waal ins trök nao de rimboe, mer ut wit nog neet precies wohaer en ouch nog neet wanneer. Euverdaag haaj ich mich bezig mit luuj te verzekere en te advisere biej ut aafsjloete van ein hypotheek of ein good pensioen.Ouch zorg ich der veur, det es de auto in de prak is gereeje, de sjaaj geregeld waert. Thei höb ich lere kinne wie ich nog eine puber waor. Veer waore toen al zo lank , det veer baove ederein oetsjtoke, veer zagen mekaar en ut waor geliek raak, de vonke sprongen der vanaaf.

Keub höb ich 14 jaor geleje lere kinne mit de vastelaovend en langzamerhandj höbbe veer os heel good lere kinne. Keub is eine geweldige vent, dae good veur zien vruiwke en kinjer zorgt.Hem wol ich waal es boer aan miene erm.

Leef luuj, ich haop det veer der mit z’n alle eine sjone broelof van make en eine geweldige vastelaovend.

Dit jaor verzeker ich uch van eine gooje boer want:“veer haje ut werm”.

Mien getuuge is Marie Antoinetta Gertruda Vulcano van Atteveld. Van beroep is ut pedicure of te waal “tenefrutselaer”.

Ziene pap is meister in ut waer beheerse en zien mam is verkuipster in ein kleierzaak. Marie is getrouwd mit Franco, ozze italiaanse wienboer .Van beroep is hae bas speler biej Rieu. Marie en Franco höbbe 2 leuke kienjer, Jader ein heel sjlum Menke van 9 jaor .(Veurig jaor waor hij de adjudant van de jeugdprins.) en Killian van 3, dae geit later vas en zeker barriton zingen.

Bruudje Truu.

_____________________________________________________

 

KINNISMAKING Broedegom:

Leef luuj van Hoogvónjere.

Gaer wil ich mich efkes veursjtelle. Miene naam is Sjaak Meuter. Dit jaor haet ich in de vastelaovestied Keub. Ich bön al 64 keer jäörig gewaes en 37 jaor getrouwd mit Lenie.Veer höbbe 2 kienjer, Richard en Marlie. Lenie höb ich lere kinne oppe kirmes in Remunj en ein half jaor later zeen veer getrouwd. Lenie is ein sjat van ein vrouw en ein gooj mooder veur os kienjer. De hobbies van Lenie zeen kwebbele, joetse, ouch mit de kienjer en verder is ut gek op ut hundje en de vogel.Lenie is sjmaal en det kump, omdet ich um oppe tied ‘ns wie zonne deig euver de taofel rol. Vastelaovend viere doon ich gaer.

Ich bön al 14 jaor lid van de Haofgengers en al 11 jaor ceremoniemeister. Ich bön eine kleinzoon van Opa van de Singel en de luuj zagte altied:”dao kump Schek de dichter, vader van 11 wichter! Ich bön de zoon van sjtäöker Sjeng van de Singel en dae waor getrouwd mit Fien oot Ool. Mien hobbies zeen joetse, danse, accordeonmeziek loestere en mit mien kienjer op sjtap gaon.

Ich höb Truu lere kinne es tweede vonk. Doe hoofs mer get te vraoge en ut vonkt altied. Ich bön heel bliej, det veer noe same ut boerelaeve in mooge gaon.

Miene getuuge is miene zoon Richard Meuter, hae is 35 jaor jonk en nog vriegezel. Zien hobbies zeen oetgaon, drummen, vastelaovend viere en op fekansie gaon. Ziene roopnaam es getuuge is Rich.

Leef luuj, laot er os same mit de getuuge Marie Antoinette Gertruda en Rich Johan Helena eine sjone vastelaovend van make!

Broedegom Keub.

___________________________________________________________

 

Boere vrouwluuj gaon op stjap nao Haör( Horn)

Driej boerinne van ’t klumpke ginge in november nao eine vrouwendaag in Haör, óm ins te kieke wie diej det in ein anger dorp orgenieseren. Missjiens waare der noch leuke dinge te belaeve, die se biej heur kóste gebroeke. Graat mós heur óm vief oer gaon haole, nou in de auto kreeg ich ’t te huare, nieks aan, de eerste act waas eine naakse kaerel, zei Truuke, en de tweede act waas eine naakse kerel zei Bloome Antje, en de derde act waas eine naakse kerel zei Marie en zo ging det noch waal efkes door, maar ze vertelde ’t eerdere keer weer op ein anger meneer, Ich kós neet good hiej oet opmake of se ’t noe erg vónje of det se ’t heel erg vónje. Ich zei nog det begós óm elf oer, en as geer d’r nieks aan höb gevónje, dan had geer mich eerder mótte belle en dan waas ich uch óm ein oer alweer kómme haole en neet óm vief oer, dus zo erg zal ut waal neet gewaes zeen. Volges mich waere se waal alle driej naat achter de ore!! Toen waas ‘t efkes sjtil in de auto en wiste se neet meer waat se móste zegke, ich zegk nog höb geer auch good gekeke want det zeet geer veurluipig neet meer. Nee zeije ze gaef ós maar ózze eige królsjpange zitting dao kins se noch lache, ich weit noe zeker det diej veurluipig neet meer vreamd gaon in ein anger dorp!!!!!!

Graat

_______________________________________________

 

Herman lokt aaj Bet !!!

Beste miense van Hoogvónjere, Noe hub ich tog get mitgemaak, det haajt geer neet veur meugelik!! Dae Herman is weer good bezig, ich waas pasgeleje biej hem op bezeuk, en waat dinkt geer waat ich dao zoog?!? Ongeluiflik, dae had hónjebrukskes in zien jassetes. Noe is det op zich neet zo raar, ich dach diej zeen veur binks, ziene hondj, maar nieks heur, die ware veur ein angere besjtumming!! Hae reep maar edere keer, kom maar, kom maar, kom maar, ich dach wo haet ter ut tog taege, en dao kwaam ze, diej aaj Bet. Ze vloog op um aaf, alsof ze um in gein hongerd jaor meer had gezeen!! Waat ein paar hóndsbrukskes tog al neet kinne doon. Volges mich waas Herman auch waal ein bietje verbaas, ich hub der sjnel ein foto van gemaak. Zo as geer kint zeen veel um de mondj der good van aope!! Auch dit waas netuurlik weer ein hot eitum veur de Melktuit.

De Sjnep van de Gezet.

____________________________________________________

 

Ex- Burgemeister zwaor gewóndj (bienao)

Op ut Ieskeuninge oetrópe aafgeloupe nóvember is de ex-burgemeister Krit gewóndj binne gekómme. Zien oor waas vakkundig beplek mit ein plaoster. Op de vraog wiej der aan dees verwonjing is gekómme kos der os gein bevredigend ajntwoard gaeve. Maar later is der geheurd gewaore det ein paar oorbelle van Truuske vol mit blood zoote. Ein anger geruch det de rónj deej dae aovend waas “ein ongelökske biej de aaj-koe-punk-tuur-is” * Achteraaf, nao flink aandringe van ózze reporter ter plekke bleek det der zich mit sjaere in zien oor had gesneje. Veer zeen bliej det der neet oetgesjoate is nao de rök.

Friej Lens * (laes “naoldje-daokter”, red.).

___________________________________________________________

 

Van de “Kemmissie” Broedspaar

Al weer ein jaor veurbiej mit ein lach, ein traon en väöl plezeer, in de evaluatie kwamen weer väöl positieve geluiden euver ’t aafgelaupe seizoen. Auch haet ós bruudje Marie besjlaote óm mit ziene echte man Herman en zien kienjer Guy en Sefke lid te waere van ’t Klumpke. Ich vinj dit weer ein gooije aanwins veur `t Klumpke, en ein van häör kienjer Juul veult zich al erg aangetrokke toet de veldjwachters, en hae dach ómdet Drika der neet biej waas det hae die rol waal effe kós euvernaemme. Good gedaon Sefke!!!

Maar veur det se ut wits zeen veer es broedspaarkemmisie alweer op sjtap, en veer noeme det fietse, óm ein nuuj paar biej elkaar te sjprókkele. Sóms geit det mekkelik mit ein broed te zeuke en soms höbbe veer zo eine broedegom, maar dit jaor hadde veer al heel sjnel ein kompleet paar biejein , en diej hadde der waal mik van gegaete, want diej sjnapte heel sjnel waat veer zeije, auch kwaame diej al sjnel mit eige iedeeje, en heur boerename hadde ze auch al sjnel bedach.

Maar dan die speculaties, en die vraoge, Kinne veer diej? Kómme se van Hoogvónjere? Wone ze biej mich in de buurt? Zeen ze vanaovend hiej? Zeen ze lid van de club? Zeen ze jóngk? En noch väöl meer van die vraoge, maar wie meer diej vraoge , wie ingewikkelder veer ’t make en soms höbbe veer die sjlimme boerinnen van ós weer ins op ein good dwaolsjpoor gezat. Auch motte veer af en toe good oplette wat veer zegke, en neet ózze mondj veurbiej kalle.

Ós nuuje broedspaar geit de ker trekke ónger häör naame…Truuj………as broed en van ..Keub……….as broedegom. Häöre thema aovend geit ónger ’t motto van Johnny en Anita. Veer dinke det veer mit dit broedspaar wear ein sjoon sezoen tegemoet gaon, en veer haupe det weer väöl miense van Hoog-Vónjere kómme kieke nao de optoch wobiej de broedegom zien bruudje geit ophaole, veur det se in de huijshuur van de Vlonder in de onech verbónje waere.

Sjoone vastelaovend gewinst van Annie en Graat

____________________________________________________

 

Frenske is jäörig en wurd zestig jaor. Der is väöl bezeuk en eederein babbelt gezellig. Dao vreug Annie de buurvrouw aan Frenske: “Enneh, wiej veul ze dich noe det ze zestig bös gewaore”. Frenske: “Bezeik……!!”

____________________________________________________

 

Werkbezeuk in Häör

In ut kader van zelfontplooijing is der ein delegatie op werkbezeuk gewaes nao de vrouwluujztting in Häör. Mit de bedoeling om get biej gesjoold te waere zeen de dames ut kefee binnen gesjtap. Nao ut öppeningswaord van de veurzitter is ut de dames al dierek opgevalle det de anger dames mit glazige auche ut lokaal verkinden. Veer höbbe ós aafgevraog of dit ein duudelik geval waas van sjlechte erkondietiejoning. Biej de eerste ekt is det miesteriej van sjlechte lóch geliek opgelos.

De middag haet diverse ekts aan ut leech gebrach. De massale opkóms van menkes zónger kleijer waas opvallend. Om ein baeter beeld te kriege van de massahiesteriej höbbe de dames mit de konneseur van dae middig ein diskussiej gesjtart. Deze man waas trouwens inkognietoo ein eige óngerzeuk gesjtart op de vrouwluuj twalet. De oetsjlaag van dit óngerzeuk is nog neet bekind. Óngervraoging van de aanwezige haet neet väöl opgeleverd. Der waas neemes besjikbaar veur enig kommentaar. Ein dame die helemaol vanoet ut boetelandj* nao dit fenomeen waas getrokke haet de delegatie in ut geheim ein en anger verteld. Dees aaj doos (42) voonj der nieks aan maar ziej waas dan ouch neet op zeuk nao ein nuuje naakse kaerel. Ze had der volgens eige waord al tweej versjlete en waas noe aan de derde bezig. Veer höbbe heur bedank en ze is mit vleugels (Redbul) weggefladderd. Helaas zeen de dames van ut werkbezeuk in ut Häörse neet väöl wieser gewaore.

In ein reactie op de vraog of het perzentaasj naakse kaerels dae aovend ein hoogtepunt had bereik is ut waal erg sjtil gebleve.

Friej Lens          * Belgj, red.

________________________________________________

 

Dankwoord Broedspaar 2006:

Och miense waat vluug dae tied, der is alweer ein nuuj sezoen begónne, det veer dan ouch al good höbbe aangeklónke. Waat waas ut sjoon en waat höbbe veer genaote, gelache en nog meer gelache. Veer höbbe der ein feesje van gemaak en det waas ouch de hele opzet van ut sjpel. Alles waat veer wólle, waat veer ós hadde veur genaome , waat veer saame höbbe gedaon waas precies det waat veer ós dao van hadde veurgesjtellt. Nieks minder maar nog väöl meer.

Veer wille eederein bedanke dae achter de sjerme haet mitgewaerk om der ein ónvergaettelik sezoen van te maake. Ouch bedanke veer eederein dae plezeer haet gehad want dan höbbe veer det ouch gehad. Spesiejaal bedanke veer netuurlik ós getuuge, Bloome Antje en Greta. Mit ós veere höbbe veer ós mit hert en zeel gepresenteerd en gefees, gefees en gefees.

Blief euver óm ut nuuje broedspaar väöl sjpas en plezeer te winse. Geneet der van want ut is zo veurbiej. Veer zeen uch “Veer Op Ein Riej”!!

Jonas en Marie

P.S. De cente zeen op……….. (Good geboerd, toch!?!)

___________________________________________________________

 

Pleinfeest.

Ouch in de zomer van 2006 waerde der door Jos en Diny weer een gezellig pleinfees georganiseerd.Eine accordeonist van de Amstel speelde toepasselikke leedjes en Thei de Rechter drejde cd tjes . De sfeer waas super , eederein ammeseerde zich good…..toet 24.00 uur. Toen waas ut uit mit de pret.

Ein of anger kniesoor haaj de pliese gebeld, det der geluidseuverlas waor ! De pliese ginge nao Thei en zagte det ut aafgeloupe mos zeen mit de meziek. Thei is emes waat (meistal) good loestert, dus dae stopde mit meziek make. De sfeer waas geliek weg. Har Nelissen (vanne meziek) vonj ut mer nieks, geine meziek. Hae löp nao Thei en vreug waorum der oetsjeit mit meziek make. Thei vertelt um det de pliese dae opdrach gegaeve höbbe en hae der ouch nieks aan kint doon.

Wao op Harie sjpits opmerkt: höbs ze die neet gezag dets doe de Rechter bös?

Truuke

________________________________________________

 

Van ôzze Friej lens reporter; Burgemeister in de klinsj mit eega.

Op ein van de feeste in ut nao-sezoen van 2005 is ózze reporter get ter oore gekómme. De daag in ut nao-sezoen zeen betrekkelijk naat gewaes. En zo haet ut zich veur gedaon det ónger sjtaond verhaol toet sjtand is gekómme. Es op eine nate zaoterdig de burgemeister Driekus nao ein ganze daag hael werke * klaor sjteit óm nao ut fees te gaon dae aovend zuut haezien eega Geertje. Van sjrik zeen um toet de sjnorhaore gaon hange. Hae kiek en zuut det zien Geertje eine plestieke taot oppe kop haet. “Maar Geertje”, zaet Driekus, “Waat höbs doe oppe kop?”. “Zuus ze det dan neet” ein verbaas Geertje. “Ich draag ein raegekepke”. Wo op Driekus meint det ut zo neet mit um mit kint. Maar Geertje wilt ut Driekus aeve oetligke en vertelt: “Ich bön vanmiddag nao de kapper gewaes en dae haet mich diej ins fijn geknip engefeunt. En noe raegent ut en ich höb geine zin in ein verraegend kapsel” Driekus echter eine sjtiefkop: “Zo naem ich dich neet mit, wiej zuut det oet”. Geertje neet misselijk: “Waat meins doe dan? Ich kiek al vief en twintjig jaor taege daezelfde kop en noe moog ich neet mit ein raegekepje naeve dich loupe???”. Fuuriejeus haet Geertje ut raegekepke in de gank gesjmete en de deur gesjlaote. En wie ut zich omdreijde waas dae Driekus al der tösse oet. Dae zoot al dreug op ein kruk wie Geertje binne is gekómme. De sjrik is ózze reporter toch waal aeve óm ut hert gesjlage biej ut heure van dit veurval. Beste burgemeister, leef Geertje; kiek toch ins nao de fotoos hiej ónger.

Zo kin ut ouch. En dink maar zo, es der gein plestieke täötjes waare gewaes, waare der noe nog väöl meer miense/kienjer op dees waereld! Waat ein leefde biej die boere…..!!! 

* Bep, (de hóndj) get vervaele, red.

____________________________________________________

 

Daag meneer van de gezet van het Klumpke.

Chris en Truus, alias Krit en Truuske kwame op eine daag mit heur kleindochter trök van ein oet de handj gelaupe feesje. Krit, door de neudige pilskes get euvermeudig gewaore had d'r neet aan gedach det ziej mit de auto ware en omdét Truuske gein riejbewies haet, mňs hae dus zellef rieje. En jao heur, ze ware halverwaege, wiej d'r pliessie controle waar. Of d'r mesjien gedronke had, vroog dae plies. "Nae heur"zaet Krit. Of d'r dan mit wňl wirke aan ein blaostest. "Jao netuurlik", zag hae. Hae bloos ins flink en jao heur, det dingk waerde helemaol greun. "Wiej kin det noe? Ich höb allein maar koffie gedrňnke, det dingk mňt kepot zeen. "loog d'r mei ein sjtaole gezich. "Laot mich dan maar ins blaoze", zaet Truuske "ich höb allein maar sjpa blauw gehad." Nou, Truuske bleus en jao heur, auch biej hem waerde det dingk helemaol greun. "Ja," zaet dae plies, "det sjnap ich neet. Dan mňt geer toch waal alcohol gehad höbbe". Truuske en Krit allebei heel euvertugend, "mer nae man, det dingk is geweun kepot. Witse waat, laot det klein auch nog maar ins blaoze, dan weite veer het zeker". Det vňnj dae plies good. Efeng, det klein bleus auch ins flink en jao heur. Auch biej hem zo greun wiej graas. Dae plies kratzde zich ins achter zien ore en zag: "Ja dan mňt dae klňmmel toch ech waal kepot zeen. Geer moog doorrieje". Krit guf gaas en ziej tuffe wiejer. Dao zaet det klein inins: " Opa, toch maar good det ich al die kletskes hób oetgedrňnke".

De groete van de (aaj) sňkkertante

_______________________________________________________

 

In ut zunke.

Dit jaor wil ich ein sjpeciaal emes in ut zunke zette.Eine mins, dae biej vaöl luuj op Hoogvonjere waal bekind is. Van beroep is der dierenarts en verder is ut eine echte vastelaovesmins. Vanaaf de 11 -11 kumse um euveral taege wo gefees waert en det geit zo door toet en met asgoonsdig! De boerebroelof in oos wiek vinjt hae sjoon en al jaore verzorgt hae in zien uppie ein serenaadje es veer de boerebroed thoes ophaole. Ich höb mich laote vertelle, det de broedspaarkemissie biej veurkeur ein bruudje zeukt, waat in de buurt van de Ambachsingel woont, zodet veer weer getrakteert waere op ut trompetsjpeel van deze miens. Gaer wil ich meneer Rieter bedanke veur zien biejdrage, ut is toch heel sjpecaal eedere keer, ich haop det de traditie nog lang door moog gaon!!

Truuke

_____________________________________________________

 

Fotocollage van seizoen 2006:

Terug naar Melktuit beginpag.