Selektie van artikelen uit:
DE MELKTUIT 2006
_______________________________________________________
Van de òpperklómp Graat.
Ut ganse jaor 2005 waas ein feestelik jaor veur de boere. Veer besjtónge 15 jaor en det höbbe veer oetbundig geviert mit de leje en vrunj van `t Klumpke en òs broedspaar Annie en Ties mit heur getuuge Antje en Jantje. In september höbbe veer eine geweldige boeredaag gehad mit allerleij boeresjpelkes en boerepraot, en daonao höbbe veer van ein heerlik boeregourmet genaote. In ein vreug stadium zeen veer weer begónne mit de veurbereidinge veur ut nuuje sezoen mit nuuje ideeje enz. Zo haaje veer ós ut ganse jaor bezig mit de vastelaovend: Veer make leedjes, veer sjrieve tekste, make foto`s, haole advertenties óp veur de melktuit, wie kleije veer de boeresjuur weer aan kómmend jaor en gank zo maar door. Mit de hulp van de hele boerefemiliej en alle adverteerders höbbe veer weer ein sjitterende melktuit in elkaar gezat. Ein ekstra waord van dank aan òzze veldjwachter Wullum, dae òzze website up to date haajt, en veur uch en eederein zörgt det de Melktuit sjoon in elkaar wirt gezat!!
Netuurlik wil ich neemes tekort doon en daoròm wil ich besjloete mit ein waord van dank aan eederein dae zich òp waat veur meneer dan ouch ingezat haet veur `t Klumpke!! Ich wins uch allemaol väöl laesplezeer toe!!
Mit boeregroetjes :
Graat van Sjtien en Niek van de Bekker, wienboer eerste Klas,
Veurzitter.
--------------------------------------------------------------------------------------------------------------------------------
Aad Burgemeister Krit
Veur de letste keer is dit mien wäördje in de Melktuit. Ellef jaor höb ich burgemeister mogen spelen hetgeen ich altied mit heel väöl plezeer höb gedaon. Neet altied ging het zo wie ich ut gedach haaj maar mit de hulp van de leje en vrunj van ut klumpke is biënao altied de zaak heel prettig opgelost of verloupe. Ich höb ellef broedspare in de onech moge verbinje, wobiej ich döks perpleks sjting van het entoesiasme waomit det die der taegenaan ginge , hetgeen het veur mich allein altied ein sjtök leuker en gemekkelikker haet gemaak. Veural as ich die ellef koppels bekiek die ich höb moge trouwe: mit häör getuuge woore det altijd geweldige luuj. Ouch die van het aafgelaupe jaor Annie Ties Antje en Jantje bedank. Mit völ plezeer dink ich aan alle gebeurtenisse trök en wil dan ouch gaer ederein bedanke dae dao aan haet mitgewirk. Nao ellef jaor waert ut tied om de ambskitting euver te drage en dus moog ich ut kommende sezoen as geweune boer het gebeure mitmake hetgeen waal effe winne zal zeen.
De broedspaare kemmissie haet het weer spits gekrege om 4 entoesiaste miense biejein te kriege om same mit heel Hoogvónjere en omsjtreke het spel te sjpele.
Het 16e broedspaar wo euver geer verder in dit blaedje vanalles euver kint laeze sjteit waarsjienlik al te trappele om in de onecht verbónje te waere door miene opvolger de nuuje burgemeister Drikes
Uiteraard wins ich miene opvolger en het broedspaar mit de getuuge heel väöl succes en plezeer toe.En mit de ongersjteuning van de leje en vrunj van het klumpke bön ich der van euvertuug det ut weer ein geweldig feest geit waere
Het sezoen waas aafgelaupe jaor erg kort maar gelökkig höbbe veer dit joar get meer tied om alles te regelen/veur te bereiden en te feesten. .
Op ‘t moment det geer dit laes ,is ’t sezoen al weer volop aan de gang en zeen de veurbereidinge veur de evenementen biënao klaor.
Beste miense veer haope der weer ein gezellig sezoen van te
maken en zeen uch gaer in grote getale op os aktiviteite versjiene. Ich stop noe
mit mien verhoal maar wil nog eers alle miense die ich nog neet höb gezeen ein
veursjpeudig, gezóndj en veural ouch ein leuk en gezellig 2006 toewinse. Toet
ein van dees daag in os boeresjuur (wiekgeboew).
Mit edelachbare groetjes van
Krit van Sjeng van de Kuuper, Burgemeister.
------------------------------------------------------------------------------------------------------------------------------------------------------------
Ozze nuuje Burgemeister Drikes
Leef luuj van Hoogvónjere,
Ut is alweer bienao ein jaor geleje, det der mich zo “naeve de naas weg” gevraog waerde, of ich de nuuje burgemeister van ut Klumpke wilde waere. Mien antjwaord waas nae en dao haaj ich auch ein raeje veur: veer höbbe eine hele gooje burgemeister ozze zeer weledele burgemeister Chris Bremmers, auch bekind es Krit van Sjeng van de Kuuper. Dae man haet aan de weeg ge-sjtaon van ut Klumpke en hae waas der auch biej toen men 23 jaor geleje vonj, det er op Hoogvónjere ein vastelaovesvereniging opgerich mos waere. Verder is ut eine man, dae wit waat er laef in de wiek Hoogvónjere, biej de Haofgengers en baoven-al biej ut Klumpke. In al zien toesjpraoke , biej waat veur gelaegeheit dan auch, wit der altied zien waordje te doon mit de juuste achtergrondj infor-matie en mit de neudige humor. 3 maol chapeau veur deze man! En noe wil dae der mit sjtoppe! En waert der aan mich gevraog of ich ut wil euvernaeme! Sjnap geer noe waorom ich nae zegk?Gank mer ins nao: Ich sjpraek zeer sjlech ut Limburgs dialect en weit lang neet alles euver ut vaste-laoves gebeure op Hoogvón-jere. Ich bön pas ein paar jaor biej ut Klumpke en weit neet zo good de waeg in dees wiek. Ut geit dus ein hele zjwaore klus waere, mer ich gaon der veur!! Ich zal mien beste boere beinke veur zette en mit de hulp van idderein haop ich det ich eine waardige opvolger van Krit moog waere. Ein veurdeil haet mien nuuj functie auch, ich waer de baas van de veldjwachters en det duit mich väöl deug, mer alle gekheid in ein sjörsker, ich haop det os broedspaar, de getuuge en idderein dae nao de receptie kumpt zal zegke, dae nuuje is neet zo good es dae aaje burgemeister, mer hae leert ut waal!
Toet sjlot nog ein aaj boerewiesheid: raegent ut in september, dan velt kerstmis in december!
Mit edelachbare groeten,
Drikes, Burgemeister------------------------------------------------------------------------------------------------------------
Óngertrouw
Names de burgemeister van Hoogvónjere de Weledelachbare ouch waal Dorstlustige hoogheid geneumd
De heer
Drikes, zoon van Arendina en Knilles de sjtraotvaeger oet Baore.
Is aan mich de plich om idderein d’r van in kinneste sjtelle, det óngersjtaonde boereluuj te kinne höbbe gegaeve, det ziej in de (0n)ech wille trouwe en waal op:
Zóndaag 19 fibberwarie a.s.
Broedegom: Jonas, zoon van Nelke oet Herte, Casper oet Remunj.
Broed: Marie van Bep van An van Bil van Sjoestersjoep en Pierre van Berb en Wullem van de Begienhaofsjtraot
.Idderein, dae waal of gein gegrondje bezwaore haet taege dit veurgenaome huwelik waert verzóch om det veural tiedes de huweliks ceremonie in ‘t aopenbaar kinbaar te make!
Names de burgemeister van Hoogvónjere
en
De sjriever van de burgelikke sjtandj:
‘t Höt van Marie van Mienekes oet Postert en de Geit van Sjörgers oet Sittard.
-------------------------------------------------------------------------------------------------
Boere Broedspaar 2006
Jonas, zoon van Nelke oet Herte en Casper oet Remunj.
En
Marie van Bep van An van Bil van Sjoestersjoep en Pierre van Berb en Wullem van de Begienhaofsjtraot
.
Heur getuuge:
Bloome Antje van de Mienwaeg oet ut Herkebos.
En
Greta, ein Nunhems zäödje van Sjra de tummerman en Aleida oet ut Neelder riek.
-----------------------------------------------------------------------------
Kinnismaking mit de Broed
Daag leef luuj,
Waem ich bön? Dan zal ich mich ins veursjtelle. Miene naam is Marianne Dahmen, ich bön aajer dan 18 jaor, getrouwd mit Herman, dae net 20 gewaes is en veer höbbe saame 2 kienjer in deze waereld gezat. Oze eerst gebaorene is Guy, 13 jaor en VMBO-er, oze tweede zoon is Juul, 10 jaor en Brink-ganger. Waat kin ich uch zegge. Misschien det ich eedere morgen werk biej ein bedrief det elektroniese toetsintrumenten repereert. Dus moch uch orgel, kieboard of diegietale piano neet meer klinke wiej vreuger dan kint geer mich altied belle om eine afspraok te maken. En verder werk ich altied 's middigs en 's aovend aan thoes; wasse sjtrieke, koake, poetse. En zo zeet geer det der neet väöl tied euverblief veur eine hobbiej. Soms es der get tied euver zól blieve dan doon ich gaer laeze of breije en ich kaart gaer ein pötje. Waat ich auch nog doorlaupend het hele jaor gaer doon is prakkezeere wie mien nuuj pekske veur de vastelaovend der oet mót zeen. Euveral doon ich mien iedeeje op; oppe tillevisie, oppe sjtraot maar auch in beukskes. Dan dink ich det mót ich ónthaaje. Zo dink ich höb ich toch eeder jaor ein sjoon kreatie in eingeflans. Ich bön veurig jaor zelfs trentsetter gewaes in Bracht. Dit jaor haaj ich ut waat betreuf de kleijer get sóberder maar det duit nieks aaf aan mien ethousiasme. Veur eeder fees en gelaegenheid mit de vastelaovend ( en neet allein dan) bön ich in allerhoogste feessjtumming. Ich bön altied veur ein geintje in ……
Ich had miene sjat al ein paar keer gezeen op versjillende feesjes maar de letste keer haet ut ech gevónk. Ich waar mit gegaon nao ein vrundsjappelikke volliejbalmetsj mit aansjloetend eine zaalvoetbalmetsj. Wie ich de zaal binnen kwaam zoog ich dae zalt en paeper (oftewaal vreuger blondj) adonis binne kómme. Saame móste veer ós mit de rest van het tiem effe werm sjlaon veur het volliej. Mit geveul kreeg ich de bal toegesjpeelt. Wis neet waat mich euverkwaam. Nao ut vollieje höb ich langs de kanjt staon kieke wie dae leeve jóng wie eine Marco van Baste de bal euver het veldj speelde. Mien hert ging d’r bienao vandoor. Aansjloetend zeen veer nog eine (twee, driej en meer) gaon drinke en wie der mich vroog veur te danse woor ich helemaol verloare. Veer höbbe gedans zónger det ich hem op de veut bön getroaje….. en det wilt get zègke! Toen höb ich gedach dit is de ware mit hem zól ich ech waal in de (on)ech verbónje wille waere. En kórt dao op is het hele sjpeel begónne. Maondje höbbe veer mótte zwiege en det veur mich….Leef luuj van Hoogvónjere waat veer ós winse veur óze broelof is det geer allemaol kómt en mit ós viert want nieks is sjooner es vastelaovend euveral mit, veur en door eederein. En es eederein dan mit duit dan höbbe veer GOOD GEBOERD!!
Marie, van Bep van An van Bil van Sjoestersjoep en Pierre van Berb en Wullem van de Begienhoafsjtraot
------------------------------------------------------------------------------------------------------------------------------------------
Kinnismaking mit de Broedegom
Leef luuj van Hoogvonjere,
Gaer wil ich mich aan uch veurstjelle. In ut dageliks laeve heit ich John Tobben.
Ich bön 5x11 jaor +2, en höb eine zoon van 22 jaor dae nao de naam Roland loestert. Ich bön gebaore in de sjtad oppe bekkerstraot, dus in het Uuleriek, en bön grootgebrach in ut Remunjse Veldj, dus in het Veldjmoeseriek. Taegeweurdig woon ich oppe Donderberg, in het riek van de Donderböl. Ich bön 8 jaor jeugleider gewaes van voetbalvereniging Swift, verder bön ich 8 jaor centefoekser gewaes van de wiekverening Put Don `67. Taegeweurdig bön ich nog aktief lid van de voetbalvereninging DHC. Mien hobbies zeen sjporte, zowaal aktief as passief, fietse(neet so wie Graat en Annie det doon), wanjele, Autorieje, de stjad ingaon, en dan ein lekker pilske drinke in ein broen kefeeke of s`zomers op ein heerlik terrasje ein beerke pikke en netuurlik vastelaovend viere!! Ut boerelaeve is mich mit de paplaepel ingegaote, want biej mien oma toes hadde ze ein boerderiej, die loog aan de riekswaeg in Herte. As kiendj zeende höb ich dao heel väöl gesjpeelt. Taegeswaordig waere de verkes dao gewaoge. Vanaaf 1 augustus 2005 bön ich in de VUT. Dus noe höb ich heel väöl vrieje tied òm van ut laeve te geneete.
Zo kwaam ut der dan auch van det ich gevraogt waerde veur eine vreundsjappelikke wedsjtreit te sjpele mit ut Klumpke. Dao höb ich mien grote vlam Marie lere kinne. Ich had al langer ein uigske op heur, want auch diej hilt van vastelaovend viere, net zo wiej ich. Ut veurig jaor waas ich al helemaol verleef op heur, en noe dach ich dit is dien kans. Ich höb toen mien aaj boereklump oet de kas gehaold en bön geliek nao heur toegesjtapt. Ut klikte zo good tösse òs tweetjes, det ich besloot om heur te vraoge of ze mit mich in de onech wilde trouwe. Det zoog ziej waal zitte. Veer wille der same eine sjoone vastelaovend van make en haupe det geer allemaol nao òzze boerebroelof wilt kòmme. Want feeste det duis se saame, en ich sjloet mich daomit geheel aan wat mien a.s. bruudje zaet: as geer allemaol good mitdoot kinne veer daonao zegke det veer GOOD GEBOERD. höbbe. Rest mich nog eederein eine sjoone vastelaovend te winse;
Jonas, zoon van Nelke oet Herte, en Casper oet Remunj.
-----------------------------------------------------------------------------------------------------------------------------------------
Kinnismaking mit de Getuuge
Leef luuj van Hoogvonjere,
Eigelik hoof ich mich neet meet veur te sjtelle, want ich dink det eederein zich mich nog waal kint herrinnere. In ut dageliks laeve heit ich Annemiek Wester, bön al bienao 25 jaor gelökkig getrouwt mit Ger, en saame höbbe veer eine leeve boerekokker, genaampt Joy, dae ich euver höb gehaaje aan mien boerebroelof mit Eedje. Tweej jaor geleeje had ich de eer òm boerebruudje te mooge zeen. Same mit Eedje höbbe veer eine geweldig sjoone vastelaovestied gehad, wo ich noe nog mit heel väöl plezeer aan truuk dink. Auch sjrief ich eeder jaor versjillende sjtukskes in de Melktuit . De meiste kinne mich dan as Sjnep van de gezet, en höb ich versjillende leedjes gesjreve veur de boere. In 1998 had ich de eer òm getuuge te zeen biej de boerebroelof van Truuke en Graat. Twee maondj geleeje kwaam Annie mich vraoge of ich nog eine keer getuuge wilde waere. Ich zei toen teage hem: wits se neemes angers, ich vinj ut waal ein eer, maar ich gun ut auch ins angere om dit sjoon sjpeel mit te make. Jaowaal zei Annie toen, maar de broedegom wilt dich heel gaer as getuuge, en auch ut bruudje sjtelt ut zeer op pries as doe der biej bös. Doe höbs zoväöl ervaring, en det vinje veer heel prettig. Want veur òs is alles nuuj. Dus……..Hoofde ich mich neet meer te bedinke, veer zòlle maar zegke alle gooj dinger doon veer in driej keer!! En vastelaovend viere doon ich heel gaer, ich haup det det ut net zo`n sjoon boerebroelof waerd as al die angere jaore, en det der weer heel väöl miense nao de boeresjuur de Vlonder kòmme, as Marie en Jonas in de onech waere verbonje!! Ich wins eederein van herte eine sjoone vastelaovend:
Bloome Antje van de Mienwaeg oet ut Herkebos.
----------------------------------------------------------------
Daag miense van Hoogvònjere,
Auch ich wil mich effe veursjtelle aan uch. Miene naam is Gerda van Buggenum. Ich bön gelökkig getrouwd mit miene Peter en veer höbbe saame 2 jónges. Nino dae is veerteen en óze Stan is der 10. Hobbies höb ich auch. Ich maak zelluf gaer kleijer, die ich dan auch aandoon. Veur mien kienjer hoof det allemaol neet want die “doon neet mit aan ein modesjoo”, zegke ze. Ein anger passie van mich is boekdanse, dao maak ich miene Peter gans gek mit. Ich werk al bienao twintjig jaor biej de begienkes in ’t bejaarde tehoes in Ech. Die doon ich verzorge en helpe mit aete. Verder maak ich gaer mit häör ein präötje. Natuurlik sjop ich auch gaer en aaf en toe gaon ich lekker ins op sjtap en waer dan soms nog waal ins “tipsy”. En as ich zegk det ich gaon dan gaon ich….. dao wit ’t bruudje alles van. Res mich nog uch en mich eine sjoone vastelaovend te winse.
Greta, ein Nunhems zäödje van Sjra de tummerman en Aleida oet ut Neelder riek
----------------------------------------------------------------------------------------------------------------------------------------------
Dankwoord Broedspaar 2005, Ties en Annie:
Leef boere en boerinne
Veur os zit ut derop. Ein nuuj broedspaar geit os noe veur in ut bonte boerelaeve van Hoogvonjere. Veer höbbe eine sjone tied gehad. Maar dit kós neet zónger euch boere en boerinne. Uche inzat bie ut versiere van os hoezer en de wage veur de optoch waas geweldig. En neet te vergaete de aankleijing van de huijschuur. Auch sjtong geer altied veur os klaor, as veer nao ein reseptie toe moste. Dan sjting dao altied ein grote dillegatie van ’t Klumpke. Om alle miense te neume, om te bedanke, is neet te doon, want dan vergitse altied wel emes en dan krieg se sjeif gezichter. Ein det is noe net neet de bedoeling. Allein os getuuge Anneke en Jan wille veer perseunlik neume en bedanke veur hunne inzat veur os. Daorom ederien bedank, dae op ein of anger meneer zien steinke haet biegedrage om os boerebroelof te doon sjlage. Hiejdoor kinne veer aan os motto: ”VEER VEULE OS JONK, VEER BEGINNE OPPE NUUJ” mit veul plezeer trökdinke.
Annie van An en Pieter van ónger de baog oppe Kruutshere en Thies van Jo en Piet van de Aolieberg
--------------------------------------------------------------------------------
VELDJWACHTER RÓNSELT VROUWLUUJ
Op zaoterdigaovend 12 november biej het oetrope van de Juubeleijemprins van de Haofgengers waas 't de burgers van Hoogvónjere toch waal effe sjrikke. Eindelik waas het pliessie duo oetgebreid mit eine vrouwelijke veldjwachter. Ein aanwins veur de buurt. Toet ós verbazing echter haet Drika häöre pliessiejas ingeruuld veur ein langk kleid. De pet die ós allemaol pas ligk in de kas. Óm toch eine solide indrök te make is veldjwachter Tom op subtiele meneer op zeuk gegaon nao vrouwelijke versjterking!
Oplettende Haofgengers
---------------------------------------------------------------------------------------------------------------------------------------------
Van de “Kemmissie” Broedspaar
Truuke haet zich dit jaor truukgetròkke van de broedspaarkemmissie. Ut haet ut te drök mit ut sekretariaat en òmdet ut det ouch in volle tevrejeheit wilt blieve doon, wilt ut zich hiej mit bezighaaje. Truuke bedankt, ut waas eine sjoone tied mit dich saame, as weer ins ginge “fietse”!! Annie haet zich veurgedrage òm de taak van Truuke euver te naeme. Annie is al heel lang lid van de boereclub en wit wiej ut sjpel in mekaar zit. Aafgelaupe jaor höbbe Truuke en ich um daoròm ouch gevraogt òm bruudje te wille zeen, zo det ut alle fasette haet mitgemaakt en hiej good euver mit kint kalle. Ut waerde in de onech verbonje mit Ties, en mit heur getuuge Antje en Jantje höbbe ziej same ònger `t motto: Veer veule òs jònk, veer beginne òpnuuj, der ein sjitterend sezoen van gemaakt!! Bedankt hiejveur!! Nao de broelof zeen Annie en ich weer geliek òppe fiets gesjtapt òm òp Hoogvònjere ein nuuj broedspaar te zeuke. Ut bruudje vònje veer òp Hoogvònjere en veur de broedegom mòste veer verder fietse nao de Donderberg. Mit hun boerename Marie en Jonas en getuuge Greta en Bloome Antje waere ziej sjtraks in de ònech verbonje door òzze kersverse Burgemeister Drikus op zunjig 19 fibberwariej.
Alle boere winse dit broedspaar ein sjitterend sezoen toe mit heel väöl plezeer!!
Mit boerekemmissiegroetjes van Annie en Graat.
---------------------------------------------------------------------
Zit Jonas mit Marie oppe bok vanne ker te knoevele, zaet Jonas: “Wilste achter in de ker gaon ? “ . “Nae !”, zaet Marie. Nao nog ein tiedje knoevele vreug Jonas weer of Marie achterin de ker wil. “Nae !” zaet die weer. Naodet ze de derde keer Nae gezag haet, vreug ter waorom ze det neet wilt. Zaet Marie: “Ich vinj ut veur oppe bok mit dich vaol gezelliger !!!!”.
-----------------------------------------------------------------------------------------------------
Burgemeister Chrit geit mit de V.U.T.
Leef luuj van Hoogvonjere, missjien hubt geer ut al vernaome, of gezeen …
.......Ozze vertroewde burgemeister is in de V.U.T.Ich had letst ein zeer intiem gesjprek mit um, en hub um ein paar zeer direkte vraoge gesjtelt. Ich vraog um wiej ut meugelik waas det eine burgemeister kuuj geit melke biej eine zeskamp van de Hoafgengers? Ich zei taege um det ich dit tog waal zeer beneje zien piel vonj!! En toen kwaam de aap oet de moew!!
Hae vonj det ambteneerswerk as burgervader tog neet zoon oetdaging meer. Zien vrouw Truuske vonj det ter as burgemeister auch veuls te lui waerde en det ter maar ins get aktiever mos waere. Ich wis neet waat ich zoog luuj!! Ich wil waal ins weite biej waem dae in de leer is gewaes mit det koeje melke, want det ging perfekt!! Ich mot zegke det veer dao tog waal trots op mooge zeen. Zelf dink ich det ter det geleerd haet van os sokkertante. Dao haet ter ein poosje mit gesjarreld, en is ter auch ein tietje mit in de onech getrouwd gewaes. Jao, jao die sjnep van de gezet hilt det allemaol good biej heur!! Verder goof ter auch nog as argument op det ter ut zat waas om eedere keer biej de resepsies wien te motte drinke. Hae drinkt zich leever ein glaeske beer. Maar as se ein belangrieke funktie hubs kins se dich det neet permitere om beer te drinke!! En as letse waas ter ter ut meer as zat det ter diej veldjwachters eeders keer in ut gereel mot haaje!! Veural mit de boerebroelof zeen dae Frenske en Wullem neet te haaje. Daoveur haet ter ein paar jaor geleje al ein ektra hulp ingesjakelt, geer kint um waal ozze sjriever `t Höt. Maar noe krieg ter van hogere handj te heure det ter mot gaon bezuunige, dus… dacht ter ich wil der vanaaf van det burgemeistersjap.
Veer van `t Klumpke winse Chrit ein waalverdeende V.U.T. en haupe det ter nog lang als boer mit moog genete biej `t Klumpke!!!
-------------------------------------------------------------------------------------------
