Selektie van artikelen uit:
DE MELKTUIT 2005
________________________________________________________________________
Veurzitter Graat aan 't waord:
Veer höbbe alweer òs derde lustrum, 15 jaor `t Klumpke, waat geit de tied tog sjnel!!Òs nuuje broedspaar is weer ein bekint gezich in dit jubilejumjaor en ut sezoen is kort, maar veer haupe waal kragtig!! De hele boerefemiliej besjteit oet leeje en vrunj van `t Klumpke. Die vrunj zeen miense die òs in alles sjteune maar gein verplichtinge höbbe. In ut totaal zeen veer dan mit ongeveer 35 boere en boerinne. Dit is ein heel gezellige klup die d`r tog alles aan prebeert te doon òm de gezelligheid en laefbaarheid op Hoogvònjere in stjandj te haaje. Veer höbbe väöl plezeer mit mekaar, maar veer doon dit auch veur uch miense van Hoogvònjere en òmsjtreke. Kòm ins oet die hoeser en gaot ins nao ein van diej gezellige aovende in de Vlonder!! Praot ins mit dees miense, kòm ins op angere gedachte, vergaet de stress en dien werk en belaef de Vastelaovend ins van dichbiej!! Väöl plezeer. Auch ein bedankje veur alle adverteerders, sjponsors en eederein dae aan dees Melktuit haet mitgewirkt. Sjoone Vastelovend same.
Mit boeregroetjes, veurzitter Graat
____________________________________________________________________
Burgemeister Krit aan 't waord:
Ich wil beginne mit ederein dae ich nog neet höb gezeen ein veursjpeudig ,gezóndj en veural ouch ein leuk en gezellig 2005 toe te winse. Het sezoen is maar kort dit jaor en veur veer het weite is het alweer Paose.
Het 15e broedspaar van het Klumpke sjteit waarsjienlik al te trappele om in de onecht verbónje te waere.Veur mich is dit in vastelaovends begrippe ein jubileum jaor, het is namelik het 11e broedspaar det ich moog trouwe.
En hoewel ich op het moment det ich dit sjrief nog neet weit waem det is, bön ich der van euvertuugd det det weer ein geweldig sjtel zal zeen. Want es ich trök kiek op die teen koppels die ich höb moge trouwe woore det altijd geweldige luuj. Ich vinj het knap wie de broedspaare kemmissie het eder jaor weer klaor krieg om 4 entoesiaste miense biejein te kriege om same mit heel Hoogvónjere en omsjtreke het spel mit os te sjpele.
Veural die twee van veurig jaor Eedje en Bloome Antje koste der neet genog van kriege en same mit heur getuuge Drika en Drikus höbbe ze der ein geweldig fees van gemaak. Diegene die neet op de broelof of angere aktiviteite zeen gewaes höbbe ech get gemis, maar troos uch geer krieg dit jaor ein herkansing.
Mit völ plezeer dink ich aan al die gebeurtenisse trök en wil dan ouch gaer ederein bedanke die der aan höbbe mitgewirk om het sezoen te laote sjlage.
Ein bezunjer waord van dank aan de miense die der veurig jaor en ouch dit jaor der weer in geslaag zeen om os beukske de Melktuit keurig te verzorge.
Op ‘t moment det geer dit laes ,is ’t sezoen al weer volop aan de gang en zeen de veurbereidinge veur de evenementen bienao klaor.
Beste miense veer haope der weer ein gezellig sezoen van te maken en zeen uch gaer in grote getale op os aktiviteite versjiene.
Toet ein van dees daag in os boeresjuur (wiekgeboew).
Mit edelachbare groetjes van
Krit van Sjeng van de Kuuper
Burgemeister.
_____________________________________________________________
Óngertrouw
Names de burgemeister van Hoogvónjere de Weledelachbare ouch waal Dorstlustige hoogheid geneumd
De heer
Krit van Sjeng van de Kuuper
Is aan mich de plich om idderein d’r van in kinnes
te sjtelle, det óngersjtaonde boereluuj te kinne höbbe gegaeve, det ziej in de (0n)ech wille trouwe en waal op:
Zóndaag 30 jannewarie a.s.
Broedegom:
Ties, zoon van Jo van Jaoneke en Nard oet Donge en van Piet de sjpaorman van de Aolieberg
Broed:
Annie, dochter van An en PieterVan ónger de baog oppe Kruutshere.
Names de burgemeister van Hoogvónjere
en
De sjriever van de burgelikke sjtandj:
‘t Höt van Marie van Mienekes oet Postert en de Geit van Sjörgers oet Sittard.
___________________________________________________
Boere Broedspaar 2005
Ties,
zoon van Jo van Jaoneke en Nard oet Donge en van Piet de sjpaorman van de Aolieberg
En
Annie,
dochter van An en Pieter Van ónger de baog oppe Kruutshere
___________________________________________
Heur getuuge:
Antje van ut Ruyterplein, dochter van Nes en Thei van oppe Ruiver
en
Jantje, de vooger, zoon van An en Peer, kleinzoon van zwart Betje.
_______________________________________
Twee vrouwluuj van gooje boeresjtandj
Leepe same langs ut landj
In de zaachte wintjerzón
Wiej zich ein good gesjprek ontsjpón
“Miene man” zag Corrientje gans sjpontaan
haet eine kanjer van ein baan
Biej de firma Appelfleur
Is dae Technies Direkteur.
Dae van mich, zag Bertje wakker
Is ‘t Klumpkes beste Bakker
Det duit dae noe al 10 jaor
Ze kinne um neet misse dao
Mer veurige waek ’t is ongekendj
Waerde hae opins impotentj
En Corrientje vroog sjeloers van kleur
“is dét dan meer es directeur ?
______________________________________________________________________
Kinnismaking mit 't bruudje:
Miene naam is Annie Schurgers. Ich bön al 36 jaor gelökkig getrouwd mit Bert. Saame höbbe veer 2 kienjer – Marisa en Patrick en eine sjoonzoon en sjoondochter. Ich bön de trotse oma van Ryan. In 1997 is Bert boerebroedegom gewaes biej ’t Klumpke, daonao is der sjriever van de burgelikke gewaore en zo zeen veer biej ’t Klumpke gekomme. In het jaor 2001 is der ouch nog prins gewaes biej
v.v.de Haofgengers.
Mien hobbies zeen: lekker joetse, sjwumme,miene kleinzoon Ryan en natuurlijk vastelaovend viere! Verder höb ich ongeveer 4 jaor in de jeugkemissie van de Haofgengers gezaete. Vanaaf dit sezoen zit ich in de broedspaar kemissie van ’t Klumpke. Graat en Truuke vónje det ich dan eers zelf mer ins in de (on)ech zol trouwe, dan weit ich tenminste wo ich euver kal es ich ein broedspaar gaon begeleide. Dao höbbe die twee waal geliek in. Die twee höbbe eine leeve boer veur mich gezoch. Ut is Ties, ich kin um vanaaf veurig jaor, toen is ziene zoon Eedje ozze boerebroedegom gewaes. Veer höbbe toen väöl plezeer gehad en noe waere veer 30 januari in de (on)ech verbónje. Kint geer ouch det sjpraekwoord: van ein broelof kump ein broelof! Ich wil der same mit Ties, os getuuge Antje en Jantje en alle luuj van Hoogvónjere ein sjoon sezoen van make.
Annie, dochter van An en Pieter van ónger de baog oppe Kruutshere.
____________________________________________________
Kinnismaking mit de broedegom:
Groot is ut veurplezeer gewaes,es ich dach aan de gezichter van mien kiener Edwin en Chantal en aanhang op mien oetrope tot broedegom 2005. Die hadde noojt gedach det ich noch zo gek te kriege waas.
Ich bön Thijs Broers, teikeneer/constructeur oppe Willem-Alexander Centrale in Buggeme en al 32 jaor wettig getrouwd mit miene getuuge Anneke. Sinds dae tied wone veer oppe Donderberg. Ich bön gebaore oppe Aoliejberg es zoon van Braobantse elders. Opgegreujd aan de Kepel en oppe Kemp. Veur de wiekraod van de Donderberg verzorg ich ut wiekblaad. Verder sjpeel ich gaer ein pötje biljaar. Ein anger hobby höb ich gevonje in het make van videofilm. Doordet Edwin in 2004 de broedegom waas, bön ich in ’t Klumpke gerold. Veur de opname van dees boerebroelof is Videovision ’t Sjpruutje opgerich. Ouch dit sezoen waas ich van plan de video veur ’t broedspaar te make, maar det mot ich noe aan eine vervanger euverlaote. Anneke is interieurverzorgster op Camillus. Veur BAS maakt det mit noch inkele anger dames de kleijer veur de kiener en de grote bonte aovond.
Same mit mien bruudje Annie, os getuuge Jantje en Anneke en alle luuj van Hoogvónjere wil ich der get sjoons van make onger os motto
VEER VEULE OS JONK, VEER BEGINNE OPNUUJ !!
Ties, zoon van Jo van Jaoneke en Nard oet Donge en van Piet de
sjpaorman van de Aolieberg
________________________________________________________
Drika geit mit Truuke en Bloome Antje en Annie en `t Höt nao Mestreech . Ut is de elfde van de elfde en det mòt geviert waere. Plotklaps belt Drika ziene Eedje op en zaet: zegk Eedje, noe stjel det ut geit raegene, dan waer ich harstjikke naat want ich höb gein parepluuj biej mich.
Och, zaet Eedje, det guf tog nieks, ich höb leever ein naate boerin as ein dreuge!!
______________________________________________________
Van de broedspaar kemmissie
Noe ich dit sjtökske sjrief mot ich weer trök dinke aan het geweldige sezoen det veer höbbe gehad mit ut broedspaar Eedje en Bloome Antje en heur getuuge Drikus en Drika. Zie hadde es motto veer gaon de boer op en ich mot zegke, det zie det op een veurtreffelikke meneer gedaon höbbe. Bedank luuj veur uche geweldige inzat.
In ut sezoen 2004 / 2005 heit ’t Klumpke heel get te viere: os 3 de lustrum en ozze burgemeister zal veur de elfde keer ein broedspaar in de (on)ech verbinje.
Dit jaor is Annie Schurgers biej de broedspaarkemissie gekomme en dao kump meer biej kieke es meinigein dink. Nao ut sezoen 2004 / 2005 geit ut mien plaats innaeme. Graat en Truuke zeen van meining, det de beste leersjool de praktijk is en det beteikent det oos Annie os dit jaor zal veurgaon es os boerebruudje!Dit jaor moog ut lekker gaon feeste, zodet ut volgend jaor mit väöl iever aan zien nuuj taak kint beginne.Trouwes es veer ein lustrum te viere höbbe haaje veer vas aan tradities en waert der emes van os leeje broed en broedegom. In Ties haet ut eine leeve boer gevónje dae good biej um pas! Ich dink det os weer ein sjoon sezoen te wachte sjteit .
Graat en Truuke winse ut broedspaar Ties en Annie en heur getuuge Antje en Jantje ein sjoon sezoen en heel väöl sjpas.
Gaer neudige veer alle miense van Hoogvónjere oet om op zondaag 30 januari nao de boerebroelof van Ties en Annie te komme.
Graat en Truuke
__________________________________________________
INBURGERINGSCURSUS VEUR TRUUKE EN FRENSKE.
Op eine sjoone zaoterdig, ut waas nog vreug in de morge, ginge tante Hillie van ut erf mit al die korve en heure
nuuje aanwins en waakhondj Tara ein stjukske wanjele. Plotseling kumpt sie tot heure sjrik Frenske taege. Maar…. Ut waas neet dae Frenske dae ziej gewint waas… Dao môs sie tog waal ut fiene van weite. Zo gezag, zo gedaon. Sjtiekum leep ziej nao det erf mit al die waopes….jao, jao luuj dae Frenske woont mit zien Truuke in ein geveerlike buurt. En…toen sjnapte Tante Hillie auch geliek waat ter hiej aan de handj waas. Det Truuke en Frenske waore nao Turkije gewaes, want ziej zooge ut hiej neet meer zo zitte.
Maar waat sie dao toen zoog…det euverveel heur tog waal, vandao det sie sjnel de Sjnep van de gezet belde. Die waas sjnel dao, want wo get euver te sjrieve velt is die van de partiej. Zo sjlum es die Tante Hillie en die sjnep ware verkleide ze ziej zich as ein Turks sjtel. Auch dae veurzitter Graat waerde mitgetrokke, en môs maar alvas gaon oefene veur Plies. In geval van ein noodsitewatiej kumpt dit dan good van pas. De sjnep van de gezet had de hasjhondj van Bloome Antje mooge lene, en det waas maar good auch. Ich kan uch vertelle luuj, det huundje haet ein gooj naas veur bepaalde geurtjes. Truuke veulde al natigheid wiej der aangebeld waerde, maar det hat sjoon pech, want noe kwaam ut waal oppe koffie!!(Maar dan in zien eige hoes!!) Tante Hillie had gooj maatregele getroffe, ziej had ein oetgebreide inburgeringstest mitgenaome. Allerlei vraoge waerde der gesjteld, want veer dachte det diej twee helemaol gein Boere ware. Ut Limburgs dialec veel gelúkkig biej Truuke nog mit, maar dae Frenske kôs der nieks meer van. Naodet ziej versjillende vraoge beantwaord hadde waerde al sjnel dudelik det ziej tog nog waal heur vaderlandj troew zeen gebleve. Maar… ein dink waas neet zo sjoon… dae hasjhond Joy had biej Frenske en Truuke ein paar verdachte tuutjes gevonje…
Diej ruukte ein bietje raar… Ut ergste van alles waas det dae veldjwachter, ôzze burgemeister mit zien vrouw Truuske hiej de sjuld van wôlle gaeve. Die waore namelik auch nao Turkije gewaes, en det Truuke vonj det die auch maar ein inburgeringscursus môste kriege!! Sjandalig eigelik, of neet soms??? En dan te bedinke det dae burgemeister allein maar eine gooje tip had gekrege van det Bloome Antje det der dae Frenske mit Truuke in de gate môs gaon haaje. Det haet dao ut aafgelaupe jaor gelogeerd, nou det haet genôg gezeen en geheurd heur!! Maar good det diej sjnep van de gezet alles in de gate hilt. Maar…. Gelukkig is alles op zien peutjes tereg gekômme hiej in Remunj. Allein dao in Turkije, dao bön ich neet zo zeker van. Môt geer ins kieke wiej det Truuke d`r biej löpt, en dae Frenske kôs waal aan ut sollicitere zeen as boer!!Verdere ontjwikkelinge zal ich zeker in de gate gaon haaje.
Van uch versjlaaggaefster de Sjnep van de gezet.
____________________________________
Is ut noe waore leefde of neet?!?
Letse Nuujs van ut a.s. boerebroedspaar, versjlaag van de Sjnep van de Gezet: Leef miense van Hoogvònjere, de hele boere femiliej is in rep en roer!! Annie en Ties höbbe zich in elkaar getoekt, is det noe neet versjrikkelik?!? Mòt geer ins kieke waat dae Ties zich unne haup hout biejein haet gesjprokkelt. Daomit haet ter zien getuuge Antje al bontj en blauw mit gesjlage. Ut ergste van alles is det Antje ut auch nog good meinde !! Ut ging ein broedsboeketje besjtelle veur de broedsreportage . Dao op begós de trammelant!! Annie vònj ut broedsboeket neet sjoon, en zo begos ut gevech!! Ut maakte zich op nao Ties, en waat dach geer, noe haet dae zich ziene rechtererm gebroake, versjrikkelik tog of neet dan!! Maar hae netuurlik neet mis, hae hauwde Annie truuk!! Eers had ut ter geine las van, maar nao eine daag bleek det Ties um eine tenniserm haet bezorg!! De enigste dae der good vanaaf gekòmme is is Jantje. Daoop is Annie um der tössenoet gepiept, en waem dinkt geer haet det weer good mòtte make tösse die tweej!! De veldjwachters Frenske en Wullem. Det begint al drek good. Gelukkig is alles good gekòmme en zeen de trouwfoto`s good gelukt!! Ich haup van ganser herte det Ties en Annie zich noe waal ins baeter gaon gedrage, want angers gebeure der nog meer gekke dinger!! Det Bloome Antje haet mich al laote weite det ut helemaol neet bliej is mit zien nuuje sjoonmooder Annie,nou dao kin ich mich waal get biej veurstjelle!! Ut wirt eedere keer oetgesjòlde veur de Sjnirp, had geer det noe gedach van det Annie. `t Höt kint bliej zeen det ter van dem aaf is. Dus veldjwachters geer zeet gewaarsjuuwt. Let good op dit sjtel, want diej höbbe de hendjes los zitte!!
____________________________________________________
Frenske op vriejerstoer.
Jao luuj geer laest ut good, dae Frenske is gesjnaajt gewaore. De Sjnep haet weer ins good opgelet!! Toevallig det ziej ut tillefoongesjprek van Frenske good kos mit loestere. Det veel geliek op, mit zonne aajerwetse tillefoon. Noe wilt geer netuurlik gaer weite waem die nuuje vlam is van hem. Nou, det zal ich uch ins gauw vertelle, Tante Kaatje!!
Jao, jao luuj, geer laest ut good. Det waas zich aan ut beklage det ziene Wullem zovaöl van hoes is, en Frenske zo wiej dae is ging Kaatje sjnel treusten. Good det is dan nog neet zo erg… maar det ut daonao so serijeus wirt, det vinj ich tog eigelik neet good van Frenske. Notabene de vrouw van ziene kollega Wullem… Nou, nou… ich zegk ut uch. Det ut serijeus waas had ich al sjnel in de gate..want waat deej ut toeval wiej ich weer in de Vlonder waas?
Tante Kaatje waas druk in besjpraeking mit de burgemeister!! Es geer mich neet geluift, dees foto’s zeen ‘t bewies!!
Wiej ut verder geit… wirt vervolgt!!
De sjnep van de gezet.
____________________________________________________
Dankwoord Broedspaar 2004: Eedje en Bloome Antje
:
Waat zeen veer tog good de boer op kinne gaon aafgelaupe jaor!!! Det höbbe veer te danke aan al diej miense diej hiejaan mitgewirkt höbbe!! Bloome Antje en Eedje mit heur getuuge Drika en Drikus wiste neet waat heur euverkoom ut aafgelaupe jaor. Ut waas eine sjitterende vastelaovend dae veer heel ós laeve langk neet meer vergaete!! Vanaaf de bekintmaking toet aan asgoonsdig waas veur ós ein groot fees. Veer wille neemes vergaete, vandao det veer zegke : eederein dae op waat veur ein meneer deraan mitgedrage haet om der ein sjitterend sezoen van te make :HARSTJIKKE BEDANKT!! Rest os nog ut nuuje boerebroedspaar ein heel sjoon sezoen toe te winse, geneet ter maar van, want ut is get einmaligs wo se heel lang op kins truukkieke mit väöl plezeer!!
Leefs van Bloome Antje & Eedje, mit heur getuuge Drika & Drikus.
____________________________________________
Fotocollage van Seizoen 2004, wat waas 't weer sjoon:
