Selektie van artikelen uit:
DE MELKTUIT 2004
________________________________________________________________________
Veurzitter Graat
Aan't waord
Ouch dit jaor höbbe veer weer mit zoon kleine vereniging ’t klaor gesjpeelt òm ein Melktuit in mekaar te stjeake, waal in ein kleiner formaat maar tog weer mit väöl kwatsj, teks, foto’s en advertenties. Hiejbiej wil ich òs leeje en de spjonsors van herte bedanke en spraek ich de wins oet det veer d’r ein leuk sezoen van make op Hoogvònjere. Veer zegke maar zo, verangering van sjpies duit aete!!!
Ut sezoen 2003 waas auch weer erg good mit òs broedspaar Ties en Dina. Ziej höbbe heur sjpel begrepe en gespjeelt en ich wil heur hiejbiej nog ins van herte bedanke.
De bekintmaking van ’t nuuje broedspaar is op zaoterdig 22 november gewaes en eindelik waas mien vrouw Bloome Antje aan de beurt, sie wirt in ’t onech verbònje mit Eedje. Het kòmmende jaor zal de boerebroelof op zondaag 15 fibbrewariej eerder beginne, zodet ’t fees meer euverdaag is en auch de kienjer en aajer miense get langer kinne blieve. Auch zal ’t boerefees weer aansjloetend aan de boereboelof zeen.
Op de zoaterdig veur de boerebroelof, 14 fibbrewariej zal d’r eine vriejgezelle- piejama- party gehaaje waere in de Vlonder, wobiej geer auch allemaol van herte oetgeneudigt zeet, maar waal in piejama!!
Auch höbbe veer besjlaote òm de kienjermiddig op vasteloavendszunjig aaf te sjaffe, nao det aafgelaupe jaor maar 6 kienjer aanwezig ware, jaomer maar veer höbbe de aafgelaupe jaore òs oeterste bes gedaon òm dit in standj te haaje.
Ich wins mien vrouw Annemiek Wester ( Bloome Antje ) en Edwin Broers ( Eedje) en de getuuge Miranda Lemmen ( Drika) en Henk van Boeijen ( Drikus ) väöl sucses, eine sjoone boerebroelof en ein ònvergaetelik sezoen toe.
Mit boeregroetjes, veurzitter Graat
_____________________________________________________
Leef luuj van Hoogvónjere
Zoon kleine 10 jaor geleeje kwaam der ein delegasie van stichting boerebroelof ’t Klumpke biej mich aan de deur mit de vraog, of ich tiedelik de rol van Burgemeister van Hoogvónjere zou wille sjpele, dit i.v.m. ziekte van miene veurgenger Frans Meisters. Tiedelik is biej de boere ein rekbaar begrip, want ongertösse zeen der al nege broedspaare aan mich veurbiej gegange. Mit vaöl plezeer dink ich aan al die gebeurtenisse trök en aafgelaupe jaor, mit os broedspaar Dina en Ties en getuuge hadde veer weer ein geweldig sjtel biej ein. Ich wil dan ouch nogmaals ’t broedspaar en de getuuge van ’t aafgeloupe jaor bedanke veur de meneer wie die der taege aan zeen gegange en uiter-aard ouch ein waord van dank aan alle leeje, gaste, sponsors enz. die der aan mitgewirk höbbe om der ein geweldig sezoen van te make! Want opnuuj waas ’t gelökt om ein paar leuke activiteite op touw te zette, die door vaöl miense van Hoogvónjere bezoch waerde, allein jaomer det der mer zeer weing kinjer nao de kinjermiddaag kwaame. Natuurlik is alles zonger probleme verloupe, veural ouch omdet ’t Klumpke duit waat de regering belaof, meer blauw op sjtraot en in dit geval door oze tweede veldwachter Wullem. Op ’t moment det ich dit sjtökske sjrief is nog neet bekind, waem ‘t 10e broedspaar waert waat ich in de onech moog verbinje, mer es ich kiek nao de broedspaare in de veurgaonde jaore höb ich der alle vertroewe in det der weer 2 enthousiaste (mit getuuge 4) miense de ker veur de boere zolle trekke.
Ich neudig biej deeze dan ouch idderein in Hoogvónjere en omsjtreke oet om os activiteite te bezeuke en mit te doon, want de boerebroelof en anger evenemente zeen veur groot en klein, diek en dun, jonk en aad,knap of lillik, boer of boerin, dus veur idderein. Toet ein van dees daag in os wiekgeboew.
Mit edelachbare groetjes van Krit van Sjeng van de Kuuper,
Burgemeister
____________________________________________________________
Óngertrouw
Names de burgemeister van Hoogvónjere de Weledelachbare ouch waal Dorstlustige hoogheid geneumd
De heer
Krit van Sjeng van de Kuuper
Is aan mich de plich om idderein d’r van in kinnes
te sjtelle, det óngersjtaonde boereluuj te kinne höbbe gegaeve, det ziej in de (0n)ech wille trouwe en waal op:
Zóndaag 15 fibberwarie a.s.
Broedegom: EEDJE , zoon van Ties v.d. Aolieberg van Piet en Jo vanne Kemp en van Antje van
ut Ruiterplein van Neske en Thei van oppe Ruiver.
Broed: BLOOME ANTJE van de Mienwaeg oet
ut Herkebos, dochter van An van Truuke en Pierke oet
Nuujehage en van Jan van Marieke en Janus oet de veurstjad.
Idderein, dae waal of gein gegrondje bezwaore haet taege dit veurgenaome huwelik waert verzóch om det veural tiedes de huweliks ceremonie in ‘t aopenbaar kinbaar te make!
Names de burgemeister van Hoogvónjere
en
De sjriever van de burgelikke sjtandj:
‘t Höt van Marie van Mienekes oet Postert en de Geit van Sjörgers oet Sittard.
_________________________________________________
Boere Broedspaar 2004
EEDJE
zoon van Ties v.d. Aolieberg van Piet en Jo vanne Kemp en van Antje van ut Ruiterplein van Neske en Thei van oppe Ruiver.
En
BLOOME ANTJEvan de Mienwaeg oet ut Herkebos, dochter van An van Truuke en Pierke oet Nuujehage en van Jan van Marieke en Janus oet de veurstjad.
Heur getuuge:
DRIKA, dochter van Marie van de Fòddeleboer van de sjoolstraot en van Sjaak de fietsemaeker van de Venlose waeg oet ut Uuleriek.
DRIKES, zoon van Arendina en Knilles de sjtraotvaeger oet Baore.
______________________________________________
KINNISMAKING
Bruudje
Moog ich mich efkes veursjtelle?
Miene naam in ut dagelikse laeve is Annemiek Wester. Ich bön al 2x11 jaor gelökkig getrouwd mit Ger Wester(Graat). Same wone veer alweer 10 jaor in Herkebos, maar os hert ligkt tog nog altied in Remunj. Ich bön dao 4x11jaor geleje gebaore in ut riek van de Kaketoes. Mien
allerleefste hobbiej is vastelaovend viere!! Dao naevebiej doon ich auch nog gaer wanjele (biej os oppe mienwaeg), puuzelle, zjwumme mit mien zuster Marij (Truuke), zinge en s`zomers doon ich gaer in de tuin fòddele!! Det is altied sjoon om te zeen wiej al os bloome weer gaon bleuje!! Zo kwaam ut auch van de zomer op eine sjoone zonnige daag, det ich eine breef kreeg mit de pos van de broedspaarkemissie. Of ik boerebruudje wilde waere!! Det kwaam tog waal onverwachs, want die zeije altied doe bös nog lang neet aan de beurt!! Zo ginge ziej op zeuk nao eine vriejer.En dao kwaam Edwin Broers oet, dae kin ich al heel lang, veer höbbe same heel vaak mit de bontje aovend oppe Donderberg mit gedaon, dus hoofde ich mich neet te bedinke!! Dae wit waal waat vastelaovend viere is!! Daorom vinj ich ut ein hele grote eer òm dit jaor same mit miene sjat Edwin(Eedje) veurop te mooge gaon biej die prachtige club van ut Klumpke!! As motto höbbe veer gekaoze: VEER GAON DE BOER OP!! Same mit òs getuuge Miranda (Drika) en Henk (Drikus) haupe veer der ein sjoon sezoen van te make!! Maar det kinne veer neet allein. Dao höbbe veer uch biej neudig!! Ich zou zegke: twiefel neet, kòm nao òs boeresjuur de Vlonder en gaot same mit òs de boer op!!!!Toet 15 fibberwariej als veer in de ònech waere verbònje!!
SJOONE VASTELAOVEND SAME!!!
_____________________________________________________________
KINNISMAKING
Broedegom
Moog ich mich efkes veurstjelle?
Miene naam is Edwin Broers. Ich bön al 1x11 jaor same mit Miranda Lemmen( Drika), en woon al 5 jaor same oppe Ambachsingel. In mien dageliks laeve bön ich wirksaam in ein vrachwagesjpuiteriej. Mien hobbies zeen kloon en pantomime sjpele biej de B.A.S. Maar ich höb ouch nog tweej sjatjes van huundjes nl. Lady en Chester, verder bön ich nog besjtuurslid van Stjichting Donderbergse Festiviteiten, dus mit anger wörd bön ich ein bezig baasje. As der dan nog tied euver is gaon ich auch nog gaer voetbal kieke biej RODA JC.
Toen ze mich kwame vraoge of ich boer wilde waere hoofde ich mich neet te bedinke, want vastelaovend viere vinj ich geweldig!! Ut waas waal ein sjoon verrassing mit waem ich in de onech gaon trouwe!!
Dit jaor” trouw” ich mit zoväöl vrouwluuj biej de B.A.S., maar ich höb miene sjat Bloome Antje belaof det ze ut toetje altied as letste bewaars.!!
Same höbbe veer mit òs getuuge Drika (Miranda)en Drikus (Henk) al heel waat aafgelache!!
Veer höbbe der dan auch heel väöl zin in òm
SAME MIT UCH DE BOER OP TE GAON ,
zodet veer der same ein sjoon knallend fees van kinne make!!
Rest mich nog alle boere, boerinnekes en alle angere vastelaovesgekke ein sjoon aajerwets boerebroelofsfees te winse!!
SJOONE VASTELAOVEND SAME!!!
______________________________________________________
Dankwoord Broedspaar 2003: Ties en Dina
Sjtampvol waas ut in de vlonder biej ôs troeweriej ut aafgelaope jaor. De tied vloog om biej ut loestere nao al diej prachtige en ludieke veurdrachte die de miense zich bedach hadde. Veer wille daorom ouch eederein bedanke veur uch aanwezigheid en de gezelligheid die geer mitgebrach höbt.
Veer als broedspaar 2003, winse ut nuuje broedspaar Eedje en Bloome Antje, net zo vä
öl plezeer en gezelligheid es det veer det hadde.Ties en Dina.
___________________________________________________
Drikus en Eedje es baomkweekers.
Van ôs Nuujts en Klatsch redaktie: Ôzze broedegom Eedje en ziene getuuge Drikus zien ein baomkweekerie begôs. Noe dae Eedje mit zien Bloome Antje, diej alle winkels in de sjtad good kint, geit trouwe, môt dae natuurlik waal veur get extra sjräöm zörge. Gelukkig veulde Drikus waal get veur ein partnersjap, want ôs Eedje dae haet allein mer broen plante in hoes.
__________________________________________________
Krit kom ins kieke !! Reep Truuske. Kiek dae miens dae gaof zien vruike eedere daag det ter van hoes geit, ein muulke. Waorom duis doe det nooijt ?. Zaet Krit: …….Och, ich kin det vruike biejnao neet !
________________________________________
Kienjermiddaag 2003:
Afgelaope jaor, tiedes de Vastelaovend, haet ‘t Klumpke traditiegetroew weer eine prachtige kienjermiddaag georganiseerd in De Vlonder. Het ganse sjpeel waerde oetgeveurd door ozze Tarzan; Ger Wester en Jane; Nicole Smeets. Ziej höbbe ein verhaal oetgebeeld wao de kinjer biej betrokke waare. Der waas muziek en eine heuse kwis euver deere. Ze hôbbe gedanst en der waas ouch ein geheimzinnige tent.
Eederein dae dao binne ging kwaam der mit ein sjpannende besjildering weer oet, zelfs de grote kienjer. De aanwezige kienjer (ouch de grote kienjer), hôbbe zich kostelijk geamme-seerd. Mer helaas waare der, net es veurgaonde jaore, zo weinig kienjer det veur ‘t kommende sezoen geine kienjermiddaag meer georganiseerd wird. En det vinje veer jaomer, mer mesjien es de miense van Hoogvonjere det wille en ouch kinbaar maake, waem wit.
Van ôs Nuuijts en Klatsch redaksie, Wullem
______________________________________________________
Graat kwaam vreuger ins te laat oppe sjool; Ich môsde de sjtier nog wegbringe want dao môsde nog ein koe gedekt waere. Verontsjuldigde hae zich. Kôs dien vader det dan neet doon ? Vreug de meister. Det dink ich waal. Zaet Graat. Mer ich geleuf tog det dae sjtier det baeter kint !!!!
___________________________________________
Sjampetter haet biejbaantje !!!
Hiej volg nog efkes ein versjlaag van de Sjnep van de gezet!! Oet ut roddel-serkwiej is mich te heure gekómme det òzze Veldjwachter oftewaal Sjampetter Wullem nog ein biejbaantje haet gekrege luuj!! Hae kreeg dees opdracht van Kaatje, diej get femiliejprobleme haet!! Ut bleek det Bloome Antje ut erg bontj haet gemaak biej zien tante!! De kuusjkes waerde neet meer verzorg omdet ut zach det ut krank waor. Tante Kaatje zo leef es diej is, waerde zeer bezurg en haet toen ein initiatief genaome òm nao de dokter te gaon in de stjad. Maar… daoveur had sie waal ein boerekar neudig!! Diej haet ze toen motte huure, want zo riek is Tante Kaatje en Ome Wullem neet!! Zo gezach, zo gedaon, maar waat veel dae huurpries taege!! Ze sjrokke zich allebei onneuzel!!
!! Toen haet ome Wullem zich neet langer bedach, en gesolliciteerd biej ut Sjwaegelblaedje de Nuujts en Klatsch, en gelökkig waerde hae geliek aangenaome. Maar…. Noe kump ut ergste miense!! Det Bloome Antje waas helemaol neet krank, det waas allein maar harstjikke verleef. Ut haet det perseunlik aan mich laote weite!!! Dus luuj…... Det haet nog heeel get good te make!!! Waat dach geer van dae Eedje? Haet det Bloome Antje zich tog eine jonge knappe vent kinne vange!!!. Gelökkig maar veur hem, want dae Eedje is tog waal eine sjat veur det Bloome Antje, want waat haet dae noe gedaon? Dae haet veur Tante Kaatje en Ome Wullem de kuusjkes gaon verzorge. Eedje haet ter al twee nao Bloome Antje gebrach, zodet det auch get veur zien Tante Kaatje en Ome Wullem kint doon. Daobiej haet ter heur nog veurgestjelt òm zien boereker te lene as sie ins nao de stjad wille gaon. Dus det is tôg waal aardig van dae Eedje, of neet dan. Jaomer genôg zeen ich dae Ome Wullem noe neet meer zo vaak, dus môt ich zellef weer meer mien eurkes de kos gaeve. Dus miense es geer nog get opvangkt of heurt van det Bloome Antje en Eedje, haaj mich dan oppe heugte. Geer kint dan belle of iemeele nao de Nuujts en Klatsch (nuujtsenklatsch@tiscali.nl) en vraoge nao de Sjnep van de Gezet.
Wirt vervolgt.
Uch versjlaaggaefster De Sjnep van de Gezet.
__________________________________________________
OPROOP - OPROOP - OPROOP - OPROOP - OPROOP !!!!!!!
Hiej volgt ein oproop veur alle miense, diej gaer vastelaovend viere, en veur de variatie auch noch boer of boerin wille zeen. Aangezeen os eige boere en boerinne zo druk bezig zeen op ut landj, en òzze burgemeister ut op ut moment same mit zien veldjwachters ut zwaor te verdure hubbe mit de bezuiniginge,
zeen veer dringend op zeuk nao nuuje “onechte echtpare”.
Veult geer uch geroope, aarzel dan neet en gaef uch op biej òs secretaresse:
Marij Severius baeter bekint as boerin Truuke. Zien boerderieadres is:
Wapenstekererf 2, 6043 SP Roermond. Geer kint um auch telefonisch bereiken
Zien tillefoonnummer is: 0475- 325282.
Òs wiek is zo oetgebreid, daat ut veur de veldjwachters gein doon is om alle miense diej binne dees wiek wone, te gaon benadere of ze gaer toet boerebroed of boerebroedegom waere gekaoze. Zo haupe veer det ut beroep boer of boerin neet geit oetstjerve, want det zou tog doodzunj zeen, of neet soms. As geer gaer informatie hiejeuver wilt verkriege kint geer auch kontak opnaeme mit ozze veurzitter:
Ger Wester ouch bekint as Graat, zien boerderiejadres is: Reewoude 100,
6075 NK Herkenbosch. Uiteraard is hae auch telefonisch te bereike onger
Nummer: 0475-536353.
Dus leef luuj van Hoogvònjere, laot uch ins inspirere, om dit sjoon festijn zelf mit te make. Ut is get geweldigs, wo se allein maar van kins druime!! Haupelik kinne veer stjraks zegke det veer good geboert höbbe.
Boeregroet van Graat en Truuke
_______________________________________________
Bös doe ooijt biej ein
waorzegkster gewaes ?, vreug Eedje aan Drika. Jao, eine keer, mich waerde eine
finansjeele taegevaller veursjpeld en det kwaam geliek oet. Ich môsde fieftig
euro betaale !!!!!!. Zaet Drika.
______________________________________________
Van de broedspaar kemmissie
Om te beginne wille veer ’t broedspaar en getuuge van 2003 bedanke veur heure inzat ’t aufgeloupe jaor. Ziej höbbe ’t sjpeel op heur meneer weer sjoon gesjpeeld. Bedankt luuj.
Nao de vastelaovend zeen Graat en Truuke om de taofel gaon zitte, om te kalle euver het nuuje veertal veur 2004. Zo es geer mesjien waal weit, zeen de leeje van stichting boerebroelof ’t Klumpke allemaol op eine laeftied gekomme, det ze verstjennig bös (die zeen dus gein 20 meer) en daorom leek ’t os een good idee om te probeere get jonger luuj biej de boerebroelof te betrekke. Oppe boerebroelof van Graat en Truuke haet Bloome Antje gezag, det het ouch nog waal ins wol trouwe, mer dan waal mit eine jonge vent! Dus toen höbbe veer Bloome Antje gevraog of ut boerebroed 2004 wol waere. Waem um get baeter kint, wit det het zich dao neet euver hoofde te bedinke, det zag drek jao. Allein had ut ein probleem, want ut vonj ut lèstig om ein keus te maake mit waem ’t wol trouwe! Der zeen eine haop men, wo ’t ein uigske op haaj! Oeteindelik haet ’t de knaop doorgehak en noe geit ’t trouwe mit ziene Eedje, ein lekker jonk menke. Veer dinke det ut ein heel gooj keus haet gemaak. Dae jong kinne Graat en Truuke ouch al heel lang en dae haet ’t vastelaovend viere mit de paplaepel ingekraege.
Dus diej twee passe heel good biej-ein. Of die twee bliej motte zeen mit heur getuuge, det weite veer neet. Graat en Truuke in eeder geval waal, veer dinke, det die twee nog heel get paraat maake veurdet Bloome Antje en Eedje getrouwd zeen! Mer zo mot det, det is ut sjpeel! In eeder geval haet het veertal veur 2004 de luuj op 22 november eine geweldige aovend bezorgd, eederein waas vol lof, dus det belaof vaöl goods veur ’t kommend seizoen.
Graat en Truuke winse ’t broedspaar Eedje en Bloome Antje en haör getuuge Drika en Drikus ein sjoon seizoen mit vaöl sjpas.
Veer neudige alle luuj van Hoogvonjere oet om op 15 fibberwarie 2004 nao de boerebroelof van Bloome Antje en Eedje te komme.
Graat en Truuke.
_______________________________________________
Programma 2004
Boerebroelof Zunjig 15 Fibberwarie: Op deze daag zal ut stjel waat zich op 22 november 2003 haet verloof, in de ónech trouwe. Rondj 13.30 oer geit de broedegom vanoet de Huijsjuur, De Vlonder oppe Faunasingel, zien aansjtaonde bruudje ophaole onger begeleiding van meziek. Ós boerefemiliej zal hiejbiej netuurlik neet ontbraeke. De sjtoet zal door de wiek trekke, óm daonao te eindige biej de Huijsjuur. Hiej zal dan rondj c.a. 14.30 oer, ut sjpel van ut ónechte huwelik gesjpeelt waere. Hiej is ederein weer vriej om ein ludiek protest oet te sjpraeke taege dit huwelik, dit moog geer neet misse. De aansjloetende reseptie doert tot ongeveer 18.30 oer. Hiejnao is nog gewoon gezellig saame zeen toet ‘n oer of 22.00. Ouch deze aovend zal gekinmerkt waere door ein boeretreditie. Later oppe aovend, wirt ter op boerewieze gezörgt veur de inwendige miens. Boerekleijer zeen gewins.
Zaoterdig 21 Fibberwarie: Optoch en sjleuteleuverdrach Hoogvonjere. Vandaag weurt saame mit de Prinse ouch het Broedspaar door de Haofgengers aafgehaold en in optocht nao De Vlonder gebrach veur de
Sjleuteleuverdrach.
Maondig 23 Fibberwarie: Stjadsoptoch: Stjichting Boerebroelof `t Klumpke zal zeker van de partiej zeen biej de Remunjse Stjadsoptoch!!
Aswoonsdig 25 Fibberwarie: De boere gaon vandaag visse. Hiej veur gaon sie nao de Vlonder biej Jos en Diny óm zich eine lekkere heringk te sjille.