Een selektie van artikelen uit:
DE MELKTUIT 2001
________________________________________________________________________
VAN DE VEURZITTER GER WESTER
Nao ein succesvol jubileumjaor van ’t Klumpke, pakke veer de draod weer op, om aan ein nuuj boeresezoen te beginne.
Nao 10 jaor haet Ad zien veurzittersjap neergelag en deze op vastenaovends dinsdaag aan mich euvergedrage, teeves waas ich noe auch veurzitter van de broedsparen kemmisie, ich höb dit jaor de hulp ingeroope van Truuke mien bruudje oet 1998 en same zeen veer de aafgeloupe zomer op zeuk gegaon nao ein nuuj broedspaar veur 2001.
De broedegom höbbe veer op Hoogvónjere gevónje, en toen veer vrooge mit wem hae dan waal wilde trouwe, zei d’r drek mit mien vriendin oet Herkebosch.
.Op 18 november van ’t jaor 2000 höbbe die twee zich in de boeresjuur van Hoogvónjere bekint gemaakt.
Op 18 fibrewarie 2001 zolle ziej dan ouch in dees boeresjuur in de onech verbonje waere en aansjloetend zal d’r dan ein resepsie gehaaje waere wao veur geer dan van herte oetgeneudigt zeet.
Ein waek later op 25 fibrewarie 2001 zal d’r dan eine boerebal gehaaje waere ter eere van ’t boerebroedspaar en ouch weer in oos eige boeresjuur. Aansjloetend zal d’r dan om 22.00 oer ein boerekoffietafel mit ein keur van Limburgse sjtreekprodukte gratis aangebooje waere.
Toet sjlot wil ich alle leeje van ’t Klumpke bedanke veur ’t in mich gestjelde vertroewe.
Bedankt aan alle adverteerders, sponsoren en donateurs veur heur birdrage aan boerebroeloft ‘t Klumpke Same mit de luuj van Hoogvónjere make veer der ein sjoon sezoen van.
Mit boeregroetjes
GRAAT
___________________________________________________________________
Boeregelök is….‘s morgens es ze net wakker bös,
spek mit eier ruuke
____________________________________________________________________
Leef luuj van Hoogvónjere
Veer höbbe weer ein jaor achter de rök,en ich mot zegge ’t waas ein heel bezönjer jaor. ‘t Klumpke bestong teen jaor en det mos gevierd waere.
Allereerst hadden veer in Mientje en Peer ein geweldig jubileum broeds-paar. Veur het eerst in de gesjiedenis van ’t Klumpe zeen die twee neet op ’t sjtadhoes maar in ein boeresjuur getrouwd. Ich mot zegge det die sjuur der sjoon oetzoog wobiej hiej nog ein waalgemeind waord van dank aan Thei v Eck van “t Haldert” dae os mit de inrichting van de sjuur geweldig geholpen haet. Daomit wil ich netuurlik neet zegge det die angere nieks höbbe gedaon maar om ederein hiej te bedanken det geit get te lang doere.
De broelof en ‘t boeren bal waren weer ein groot succes en veer haope det in 2001 te kinne herhaole. Mit halfvaste waerde eine “echte “aajerwétse juke box in de Vlonder opgesjteld en samen waerde gesjprónge ,gedans en gelachen.
2000 Waas veur ’t Klumpe ein feesjaor maar ouch ein jaor mit eine nuuje doorsjtart.
Mit Graat ozze nuuje veurzitter veurop gaon veer de toekomst vol vertroewe tegemoot.
‘t broedspaar 2001 Kaatje en Leike zeen op 18 november, veur het eerst mit de wiekbewoners derbiej, in het wiekgeboew bekind gemaak. De test mit de toetsemeter höbbe ze glansriek doorstange en dus zin zie offesjeel verloof. Zoals ’t der nao oetzuut höbbe die twee samen mit her getuuge der echt zin in om samen mit uch, en daomit bedoel ich alle miense van de wiek Hoogvónjere en omstreken, der ein geweldig sezoen van te maken.
Beste miense samen mit de Haofgengers haopt ’t Klumpke uch ein sjoon en gezellig vastelaovend sezoen 2001 te kinne bringe en zeen veer uch gaer in grote getale op oos aktivieteiten versjiene.
Mit edelachbare groetjes van
KRIT VAN SJENG VAN DE KUUPER
Burgemeister.
_____________________________________________________________________________
Broedspaar 2000
Ein waord van dank aan het broedspaar 2000 en häör getuugen en broedskinjer veur het leuke jaor det veer mit häör mochten belaeve.
Ouch ein waord van dank aan alle luuj van Hoogvónjere, die ein stjeinke höbbe biej gedrage om de boerebroelof van het jaor 2000 toet ein sjoon feest te make.
Het sjpeel is weer gesjpeeld, want ‘t geit toch om ‘t plezeer
Leden van ‘t Klumpke
______________________________________________________________________
Veldjwachter krieg nuuj waope
Ozze versjlaaggaever haet vernaome det ozze veldjwachter in de toekomst mit des petoefele op pad geit.
Neet lache miense want hiej in versjuult een ech wapen. Dees dinger zeen in Ingelandj gemaak biej Sjeng Bond in ziene werkplaats. Hae kin al aardig oet ziene sloef sjeette, dus miense kiek oet als geer hem zeet mit deez sloeffe aan, want hae stjeit op sjerp.
Van eure versjlagroomgaever Kobus
_________________________________________________________________________
Verleef, verloof en getrouwd?
Op eine sjone zaoterdig middaag ging ich wanjele oppe Mienwaeg, same mit Frenske. Veer haaje al ein half oer gelaope en veer woore nog nemes taege gekomme. Het waas heerlik sjtil in ’t bos, allein heurden veer de veugelkes fluite en aaf en toe zoge veer ein eikheurnke in de buim laope. Ich zag taege Frenske, laote veer ins nao ’t elfe-meertje gaon, dao kinne veer efkes oetröste op ein benkske. Zo gezag, zo gedaon. Veer gaon dao ein sjtil paedje in en op ins zeen veer twee bekinde luuj.
Waem zeen veer dao? Juust, Ruud en Branka. Die twee keke wie eine boer, dae tandjpien haet, wie ziej os zoge.Ich zag taege die twee: “Zeet geer ouch aan ’t geniete van de sjone natuur hiej” Jao zag Ruud, waat is het hiej sjoon, ich sjnap neet det Gerry leever toes oppe bank blief zitte. Ich kwaam Branka toevallig taege en det waas zich aan ’t beklage det Kobus ’t zo drôk haet mit zien bekkerie.Ich höb Branka toen sjpontaan oetgeneudigd om mit mich te gaon wanjele oppe Mienwaeg. En noe zeen veer hiej en komme uch taege. Haaj estebleef de mondj dao euver taege Gerry en Kobus. Angers gaon die dao nog get achter zeuke“! Branka veulde zich ouch neet op zien gemaak, det waas dudelik te zeen. Het waas heel verlaege en det bin ich neet gewint van dem.
Geer moog van mich waete, det ich zo mien twiefels höb biej det verhaol waat ziej os vertelde, want ich zal ich uch vertelle, det die twee allein mer uig hadde veur zichzelf, die höbbe niks gezeen van de natuur oppe Mienwaeg. Ich bôn benuujd wie det verder zal gaon mit die twee….waem wit of det oetstjepke nog ein stertje krieg.
Toevallig had Frenske zien foto apparaat mitgenaome en dae haet van die twee een foto gemaak. Veur de foto zeen ziej wiet vanein aaf gaon stjoan, mer ich bön neet gek. Ich begriep ouch waal, det zie nog neet te koup wille loupe mit haor verleefheit.
Ich haop det ’t get weurt mit die twee, dan höbbe veer weer eine sjone broelof in ’t veroetzicht.
Truuke.
_________________________________________________________________________
óngertrouw proclamatie
Names de burgemeister van Hoogvónjere
de Weledelachtbare heer
Krit van Sjeng van de Kuuperis aan mich de sjriever van de burgelikke sjtandj de plich
om idderein d’r van in kinnis te sjtelle, det ongersjtaonde
Boereluuj te kinne höbbe gegaeve, det ziej in de (on)ech wille trouwe en waal op:
Zôndaag 18 fibberwarie a.s.
Naam broedegom
:Leike van Jeu van de Keuninklikke oet Hier en van
An van Rinus en Mientje oet Gemert
Naam broed:
Kaatje van Antoinetta van de Bosse oet Eygelse
en witte Koos van Nico van de bollsjuur oet Lutjebrook
Ederein, dae waal of gein gegróndje bezjwaore haet taege dit veurgenaome huwelik
waert verzóch om det veural tiedes de huweliks ceremonie in ‘t aopenbaar kinbaar te make!
Names de burgemeister van Hoogvónjere
‘t Hôt van Marie van Mienekes oet Postert en deGeit van Sjôrgers oet Sittard.
sjriever van de burgerlikke sjtandj.
__________________________________________________________________
Moog ich mich effe veursjtèlle?
Leike.
Bekinjd van de Kerremelle van Sjwif. Geer wèt waal die voetbalclub die eder jaor oppe boerebroelof ut boerebroedspaar kump felicitere. In ut ech bön ich getrouwd mit miene getuuge Rietje, oftewèl Astrid. En vader van boerebroedsjòng Matje, oftewèl Maurice. Euverdaag bön ich te vinje op ut belastingkantoor en det is naeve mien activieteite biej ut Klumpke, de Kerremelle, ut voetballe en de teeleviesie ein gànze belasting.
Die van Sjwif zölle waal gedach höbbe, laot Leike maar gaon sjpraeke biej ut Klumpke want voetballe kint d’r toch neet. Maar ich môt zègge det mien taegesjtèngers toch waal boerekwaliteite in mich zeen. Ze roope toch döks taege mich: “lompe boer”.
Ouch biej de VARA zooge ze in mich eine gooje boer om mit te doon in de T.V. serie All Stars es Poldervogelboer. Ich waar 6 december 2000 te zeen, mit nog vief angere Remunjse Poldervogels, in de 1e aaflevering van de tweede serie All Stars. Die ut gemis höbbe, neet getreurd. Op woonsdaag 21 fibberwarie 2001, tösse de boerebroelof en Vastelaovendj in, komme veer weer oppe t.v. in de kampioenswedsjtrijd Poldervogels - Swift Boys. Den doon d’r 5 Limburgse Poldervogels(boere) mit. Veer oet Remunj en eine oet Grubbevòrs, geheime wapen Poldervogel Henk. Dees aaflevering kint geer zeen op groot sjèrm, same mit de in tenue aanwezige Poldervogels biej Bar & Grill “Café Schlicher” Nassaustraot 130 Remunj van Poldervogelkeeper Leon Schlicher. Ut Café waert dan weer omgeboewd in boeresjtiel es Boerekantien van de Poldervogels. Veer probere, boete de Poldervogels, nog eine of meer All Stars acteurs op dae avondj aanwezig te kriege.
Maar ut sjoonste waas toch wie de Superboere, de Hereboere van ut Klumpke, mich vanne zomer kwaame vraoge of ich Boerebroedegom wilde waere veur ut sezoen 2001. Ich waas heel vereerd en zag dus ouch metein Jao.
Dao biej de All Stars höb ouch ein leuk bruudje getroffe (kiek maar oppe foto in dees gazet).
Maar ut waas te laat. Ich had mien bruudje al lere kinne, en waar veur vief paerd, twelluf vèrkes en zesteen keuj metein verkoch wie ich het veur de eerste keer zoog. Mien Kaatje van Antoinetta van de bosse oet Eygelse en witte Koos van Nico van bollsjuur oet Lutjebrook, wo ich op 18 fibberwarie 2001 in de (on)ech gaon trouwe en same mit uch väöl boeregelök zal höbbe. Want veur ôs is Boeregelök……….Boerebroedspaar zeen van ut Klumpke mit es thema :
Boeregelök is………
Det kint geer zelluf invulle, want det is veur ederein get angers.
Boeregelök same,
Leike van Jeu van de Keuninklikke oet Hier
en van An van Rinus en Mientje oet Gemert
____________________________________________________
Wie geer aan ein broed van de buure kump!
(Kinnismaking mit Kaatje)
Oet ’t ouch oet het hert zegke ze waal ins en soms is det waor. Wie veer zes jaor geleje oet
Hoogvónjere vertrokke hadde veer neet gedach, det veer nog vaol minse zolle zeen. Natuurlik deej die gedachte pien mér aaf en toe mot eine miens get nuujs probere.
Herkebosch bleek eine geweldige nuuje toeshaave mit ut veurdeil det het erg dich bie Hoogvónjere ligk.Ut is een prachtige combinatie gebleke.
Ouch os vrunj Rietje en Leike, wo euver geer sjtraks meer kint laeze in dit blaad, versjeene al gauw in de zomerperiode op camping ut Elfenmeer in Herkebosch. Soms waeje die waal ins bie os binne. Det gebeurde ouch in de zomer van 2000.
Niks vermoedend sjudde ich gezellig ein pilske in. Toen veer de ganse aovend euver koetjes en kalfjes haaje gekald en veer aafsjied wilde naeme bleef Leike ein bietje draale, ich sjnapte neet waar der aan de handj waor mèr op ins kwaam het hoge woord toch der oet.
Leike wilde mit mich in de onech treeje. Ich waas ein bietje euverdondert mèr toch zei ich van herte jao.Zo waerde ich Kaatje van Antoinetta van de Bosse in Eygelse en witte Koos van Nico van de bollsjuur oet Lutjebrook.
In ut dageliks laeve bön ich getrouwd mit Wim Smeets en mooder van Claudia. Mien hobbies zeen zinge bie Into the Music in Herkebosch (det zeen luuj die geer zinge mèr ouch gaer ein pilske drinke), knutsele en ut veure van redaktie en presentere van RTV magazine bie de RTV van Roerdale. Aaf en toe mot ich ouch wirke en det doon ich es secretaresse bie de kraamzorg van Sjtichting Toeszorg Midde Limburg. Es d’r nog get tied euver blief kiek ich gaer nao echte vrouwluuj films oppe tillevisie, of gaon ich wanjele mit Wim. Ich zou nog waal vaol meer wille mèr edere keer is de tied te flot om.Noe maak ich echter van herte tied veur miene vriejer en natuurlik ouch veur uch zodet veer same ein paar feine feesjes kinne bouwe!
Ich wins uch vaol boeregelök toe.
Kaatje van Antoinetta van de Bosse in Eygelse en witte Koos van Nico van de bollsjuur oet Lutjebrook.
____________________________________________________________
Boeregelök is:……..
mit pien in de rök opstaon,
en ein kachel höbbe wo se dich aan kins werme.
__________________________________________________
Kènnismaking mit ut Bruudje
Wie ich mien bruudje höb lere kinne is alweer zo’n 16 jaor geléje. Ut waas in de zomer van, ich mein 1984. Det waas eine gooje, wèrme zomer mit aaf en toe get raege. Geer begriep det veer biej ôs toes oppe boerderie eine gooje oogs hadde.
En det môs natuurlik gevierd waere oppe oogsfeeste in augustus. Dus trok ich zaoterdig-saoves nao ut patronaatsgeboew in un anger dörp, Eygelse, wo eine boereband sjpeelde van örges oet de Peel.
Wie ich binne kwaam haaj ich mien bruudje metein op ut aug. Het zoot aan ein taofel biej die boereband oet de Peel. Mit zien koreblònje haor zoog ut oet wie ein ingelke. Maar d’r waare meer mansluuj op det ingelke aan ut aoze. Dus môs ich ut sjlum en veurzichtig aanpakke, want ich waar eine vraemde haan oppe mèshaop.
Ich besjloot mien sjtoute klump aan te trekke en ging nao um toe en vroog of het get te drinke wôl. Gelökkig zag het jao, maar ich môs toen natuurlik wèl nao de tap toe om die 2 pils te haole en waar dus effe van mien ingelke weg. En wie gezag, ut waas dorstig waer en dus leep ich dökser nao de tap toe om pilskes te haole. Die mèn van de boereband haaje det in de gaate. Die haaje de uig ouch neet allein veur note te laeze, want die waare ouch nao ut ingelke aan ut spienze. Ze vrooge mich constant om beer te haole zodet ich neet biej mien ingelke kôs sjtaon. Op ein gegaeve ougeblik ginge ze get muzikaal improviseere en zònge ze zellufs :”laop nao de tap toe Lei, naem get te zoepe mit”.
Noe haaj ich wèl väöl dòrs, maar ich wòl toch eigelik mien bruudje gaon versiere. Wie ich weer uns terök kwaam mit ein blaad beer zag ich taege de jònges van de band: sjpeel ins ein dansmeziekske wo ich mit mien klump op kin danse”. Die boere van Eygelse koste oppe sök nog neet danse. Dus dit waas veur mich dé kans om mien ingelke mit te kriege. En jao heur, de boereband sjpeelde dae klompedans en mien ingelke ging mit mich danse.
Onger ut danse sjuufelde ich langzaam nao de oetgang. Lei haaj geine zin meer om nao de tap toe te laope, want hae waar al half ônger de boerekèr gekomme. Hae wôl noe zelluf gaon oogste .
In eeder geval, dae avondj höbbe d’r twee good geboerd. De eerste waar die boereband. Die zeen toen bekind gewaore mit ein leedje euver: Laop nao de tap toe Lei en ein Klompedenske. (wo ein anger Boerebroedspaar nog heel döks op gedans haet) De angere waar ich, want ich haaj mien bruudje lere kinne en waal:
Kaatje van Antoinetta van de Bosse oet Eygelse en witte Koos van Nico van de bollsjuur oet Lutjebrook.
Waas geteikend
Leike
______________________________________________________________
Ut boeregelök
Ut waas september 2000 toen veer weer mit os getuuge Rietje en Wullem biej ein waore. Veer dachte nao euver ut laeve en veer kwame toet de conclusie det se euveral waal get positiefs in kins zeen. Veer zeen gans zelluf en gans ouwerwets, zonger hulp van Emiel Ratelband en consorte, geweun door os boereversjtandj te gebroeke toet die conclusie gekomme!
Det ging zo. Veer haolde herrinneringe op aan de have feeste in Wessum wo veer op eine blauwe maondig terech kwame. Ut enige waat ich nog weet is de kater dae ich gratis en veur nieks kreeg. Of van dae keer kampere in ut noorde van ut landj, nog nooit höb ich zovaol water oet d’n hemel zeen valle en natuurlik haaje veer ut ouch euver dae keer det Leike prins waas van de Kerremelle van Swif en veer same mit Rietje en Wullem ein sjoon leedje gemaak höbbe. De gebeurtenisse van hiej baove höbbe allemaol ein euvereinkomst, namelik det veer of anger luuj dao vaol boeregelök bie höbbe gehad.
Door de raege bie os bezeuk aan ut noorde van het landj höbbe veer neet zovaol geldj oet kinne gaeve. Det kwaam good van pas want oppe truuk waeg bleef de auto staon en omdet veer neet vaol geldj oet haaje gegaeve koste veer de takelwage betale om d’n auto nao hoes te bringe.Door de kater dae ich haaj nao de have feeste in Wessum mos ich toes blieve om op dem te lette.Ut boeregelök daobiej is det ich dao door de intelligentie- tes miste op mien werk en dao door mien baan nog sjeeds höb!
Ut boeregelôk van Britney Spears is det het derbiej waor wie veer ut leedje veur de Swif Kerremelle maakte. Het leed dan sjeeds ein buurke. Gesjrokke zong ut dan sjeeds:
“Oeps……..i did it again”. Oze producer heurde det toevallig en hae sjloot meteen ein contract aaf mit Britney . De res van ut verhaol kint geer waal. Det is Britney zien boeregelök.
Waat veer daomit wille zegke is…………
Leef luuj, kiek om uch hèr, den vindj geer vanzellef eur boeregelök.
Veur os is in dit sezoen boeregelök:
eine boerebroelof in Hoogvónjere!
_______________________________________________________________________
Aeve Veursjelle
Ich bön Wullem van Truuke en Sef oet ut zuide. Gebaore in Nuujehaage, es kleine poet al verhoesd nao Gullepe en als prille teener nao Gelaen wo ich mien maedje höb leere kinne.
Det hit tegewoordig “Kaatje van Antoinet van de Bosse in Eygelse en Koos van Nico van de bollesjuur oet Lutjebrook” eine hele mondj vol waor. Saame zeen veer in Remunj komme woone wo veer Rietje en Lei höbbe leere kinne ómdet Kaatje en Rietje saame Basketbal sjpeelde. Nao inkele jaore höbbe Kaatje en ich ós ein sjtulpke ingerich op Hoogvónjere.
Hiej bön ich saame mit de buure eine Volleybalclub begonne, R.V.V. De Eagles, wo ich noe noch altied saame mit Rietje op de woonsdigaovende ein bälke gaon sjlaon. Det Kaatje en ich zes jaor geleeje, nao ellef jaor op Hoogvónjere gewoond te höbbe, nao Hirkebosj verhoesd zeen, haet dao geine aafbreuk aan gedaon. Al mit al zeen veer toch al dik zeeveteen jaor op Hoogvónjere aktief en kinne veer Rietje en Lei zelfs nog langer. Ut waor dus neet meujelik om jao te zegge toen Lei mich vroog of ich ziene getuuge wou zeen.Ich zal der dan ouch alles aan doon om deze vastelaovend zo gezellig wie meugelik te maake.
En onger os gezag zout geer zón sjoon maedje es Kaatje allein laote mit zónne vraemde kaerel ? Nae toch?
Wullem van Truuke en Sef oet ut zuide.
_______________________________________________________
Rietje, Matje en Jock
Moog ich mich efkes veursjtelle?
Ich bön Rietje van Nelke en Hannes van de sluus.
Eigenlik bön ich meer ein visboerinke. Ich kom namelik van de zeesluus aaf. Via ’t kenaal bön ich aafgedreve euver de Moerdijk nao de Maas en aangesjpeuld in Remunj, es ’t maar dun biej ’t water is, det blief trekke.
Wie ich hiej kwaam wone, bön ich döks op sjuif gegange om eine grote vès te vange. Nao eers ein paar keer achter ’t net gevès te höbbe, is ’t mich oeteindelik gelök, om eine sjoone vès aan de haok te sjlaon. Dae kwaam vanoet ’t zuide via de Maas aangesjwòmme en is toen in mien nette versjtrik geraak. Geer kint ‘m waal, Leike van Jeu van de Keuninklikke oet Hier. Es det gein boeregelök is! Same höbbe veer eine zoon. Hae is boerebroedsjòng en neumt zich Matje, maar ziene echte naom is Maurice. Ut blood kruupt wo ut neet gaon kan, want hae is net zo wie ich eine visleefhöbber en duit ouch gaer vesse. Ziene boerehondj heit Jock, en det is ouch al ein echte waterrat.
Omdet ich ein ech vissersmaedje bön, höb ich get mit nette. Mien hobbies zeen dan ouch basketballe en volleyballe. Daomit höb ich Kaatje en Wullem lere kinne.
Kaatje en ich sjpeelde de sterre van de hemel aaf. Jaore höbbe veer mit veul plezeer gebasketbalt. Veer waerde echte boezemvrundinne.
Wie ’t mich vroog om getuuge te waere bie zien huwelik, hoofde ich mich gein twee keer te bedinke, ich zag direk jao! (Kôs ich metein de broedegom in de peiling haaje).
De angere getuuge is Wullem, womit ich nog sjteeds ’t bälke euver ’t net sjlaon biej volleybalklup “De Eagles”.
In elk geval sjteit ’t veur mich wie eine paol baove water vas, det ’t ein heel sjoon sezoen zal waere. En wie ein ech vissersmaedje, gaon ich door toet en mit ’t heringe
sjèlle.Väöl boeregelök same,
Rietje.
_____________________________________________________
Veurzitter van ’t Klumpke aopent nuuj kefee in de wiek HoogvóngereVlak veur ’t ter perse gaon van dees melktuit bereikte mich ’t volgende nuujs:
Waat nog nemes spits haet gekrege, det is oze nuuje veurzitter Graat gelökt! Nao de vastelaovend start de boew van ein nuuj kafee op het Brinkplein.Wie ich um vroog wie hae det spits haet gekrege vertelde der, det hae ein gooj sjörgker haet biej de gemeinte Remunj. Noe weit ich waal det hae nog neet zo lang geleje ein nuuj sjörgker haet gekoch, mèr det hae die veur dit plan wol gebroeke, det wis ich neet. Ich zag taege um, doe kins noe waal mooge beginne mit boewe, mer doe höbs gein raekening gehaaje mit al die luuj, die róndom det plein wone. Doe zols der waal achter komme, det die geregeld nao de pliesse belle, es der get vaöl kabaal is, det doon die ouch es der ins get leuks in de Vlonder te doon is en dan höbse de poppe aan ’t danse!
Jao, zaet Graat, det weit ich ouch waal, mèr dao höb ich al ein oplossing veur gevonje, die luuj mooge biej mich eder wiekend gratis 5 pilskes komme drinke, dan haaje die waal heure mondj!Natuurlik wol ich ouch van ‘m weite of hae neet bang is veur de concurentie van Jos en Diny van deVlonder want det is toch ’t gezelligste kefee van Hoogvónjere.
Ich heur ’t al zag Graat, doe bös gaar gein zakenvrouw, det höb ich allang besjpraoke mit Jos, want mit ein nuuj kefee trekke veer meer klantje aan en de winst, die deile veer saame!
Op ongerstaonde foto krieg geer al eine indrök wie det nuuj kefee der oet geit zeen.
Zo te zeen höbbe Graat en Bloome Antje (det is zien vruiwke) der waal zin in om in os wiek ein nuuj kefeke te beginne! Vanaaf dees plaats wins ich heur dan ouch vaöl succes en gooj zakes!
Truuke
___________________________________________________________________
De outfit van ozze nuuje veurzitter!!
Aafgeloupe jaor is de functie van veurzitter euvergedrage aan Graat. Veurdet dit gebeurde is ter waal ut ein en anger waat geer nog mot weite! Graat zól Graat neet zeen, es ter neet ein nuuj pak zól wille höbbe om good veur de daag te komme in zien nuuje functie van veurzitter.
Hae haaj eine hoofsponsor gevónje, want dae haaj der neudig omdet der es simpele wienboer neet genog geldj verdeent om zich ein sjoon nuuj pak te laote make! Aangezeen Kobus Krintemik op werme breudjes laeft, waas hae waal genege om Graat te sponsore. En kiek ins waat ein sjoon stöfke hae haaj oetgezoch veur de nuuj boks van Graat.
Graat dae sjaamde zich de kop vanne ore aaf! Gelökkig waas der zo sjlum det der die ore nog vas heel!! Angers waas der die nog kwiet geraak. Ger Gazelle kós ter waal mit lache zo es geer kint zeen en Graat vonj het toch maar baeter om nao eine nuuje sjponsor oet te kieke.
Eventuele belangsjtellende sjponsors kinne belle nao ozze nuuje penningmeister Ruud Wieringa. Tillefoon: 3 x11 2 x 11-7
Bloome Antje
_________________________________________________________________
Ongertösse gaon Ger Gazelle en Graat saame nao leuke feesjes wo de “riekere” tak van de boere komme! Saame kieke ziej zich de ouge oet waat veur outfits dees boere drage. Noe mèr haope det der väöl sjponsors reagere!!
_________________________________________________________________
Boeregelök is…..wakker waere en aan ‘t Klumpke dinke
_________________________________________________________________